Vətənə həsr olunmuş ÖMÜR
Teymur Osmanlı, 31 may 1995-ci ildə İsmayıllı rayonunun Cülyan kəndində dünyaya gəlib. O, həyatının ilk illərindən etibarən, sadə və mərd xarakteri ilə diqqət çəkib və bu keyfiyyətləri onu gənc yaşlarından etibarən ətrafındakılara nümunə edib. Teymurun vətənə olan sevgisi, cəsarəti və fədakarlığı, onun həyatının ən vacib istiqamətini müəyyənləşdirdi.
Redaktor.az xəbər verir ki, Teymur 2001–2012-ci illərdə İsmayıllı şəhər İ.Həsənov adına 1 saylı tam orta məktəbdə təhsil alıb. Məktəb illərində yüksək nəticələr göstərmiş və güclü liderlik qabiliyyətlərinə malik olan Teymur, daha sonra Azərbaycan Dillər Universitetinə daxil olub və Fransız dili üzrə bakalavr təhsilini başa vurub. Təhsilini tamamladıqdan sonra Teymur, Bakı şəhərində notariat kontorunda baş mütəxəssis olaraq işləyib. Lakin 2020-ci ildə başlanan Vətən müharibəsi, onun həyatında bir dönüş nöqtəsi oldu.
Polad Həşimovun şəhid olması xəbəri Teymuru dərindən təsirləndirdi və o, heç bir tərəddüd etmədən, öz işini tərk edərək Vətən uğrunda 2020-ci ildə könüllü olaraq 44 günlük Vətən muharibəsinə qatılmağa qərar verdi. Teymur, Polad Həşimovun döyüşlərdəki qəhrəmanlığını və Vətənə olan sadiqliyini nümunə götürərək, həmin yolda irəliləməyi seçdi. O, 2020-ci ilin oktyabr ayında, Suqovuşan-Talış istiqamətində gedən döyüşlərdə, cəsarətlə döyüşərək qəhrəmancasına şəhid oldu.
Teymur Osmanlı şəhid olmasaydı, bu il may ayında 30 yaşını qeyd edəcəkdi. Lakin onun həyatı, gənc yaşında sona çatmasına baxmayaraq, Vətənin müqəddəs torpaqları uğrunda döyüşərək ölümsüzləşdi. O, həyatının ən gözəl illərini vətəninə həsr etdi və şəhidlik zirvəsinə ucaldı. Onun bu qəhrəmanlığı və mübarizliyi, yalnız ailəsi və yaxınları üçün deyil, bütöv bir xalq üçün örnək oldu.
Müşviq Mustafayev
Bizi Telegram-da izləyin...
