Suraxanı rayonu üzrə əhalinin su təchizatı 98 % təşkil edir - ADSEA
Bakının Suraxanı rayonu üzrə əhalinin su təchizatı 98 % təşkil edir.
Redaktor.az xəbər verir ki, bu barədəd Azərbaycan Dövlət Su Ehtiyatları Agentliyinin tabeliyindəki İri Şəhərlərin Birləşmiş Su Təchizatı Xidməti məlumat yayıb.
Bildirilib ki, Suraxanı rayon Sukanal İdarəsinin xidməti ərazisinə 5 mənbədən su daxil olur. Bunlar 41 Şərq su anbarı, 82 Şərq su anbarı, Qaraçuxur su anbarı, Ceyranbatan-Qala-Pirallahı su kəməri və Maştağa su xəttidir. Rayon ərazisində 15 ədəd müxtəlif diametrli giriş və çıxış xətləri mövcuddur.
Abonentlərin 48 %-i, yəni 145 282 nəfərdən çox sakin sutka ərzində fasiləsiz su ilə, 58 % əhali isə ən azı 6 saat olmaqla gündəlik qrafikli rejimlə su ilə təmin edilir.
Suraxanı rayon Sukanal İdarəsinin baş mühəndisi Nəriman İsmayılov bildirib ki, ərazidə 496 kilometr məhəllədaxili içməli su xətləri və 116 kilometr magistral su kəmərləri mövcuddur. Həmçinin o qeyd ki, rayon sukanal idarəsi ərazisində 22 nasos stansiyası, 23 su anbarı fəaliyyət göstərir. Həmin nasos stansiyalarından biri də Yeni Günəşli qəsəbəsi V massivində yerləşir və 5 500 abonenti 24 saat fasiləsiz su ilə təmin edir.
Ümumilikdə ötən il ərzində su şəbəkəsi üzrə 3103, kanalizasiya şəbəkəsi üzrə isə 6428 qəza aradan qaldırılıb, 3,7 kilometr yeni su xətti və 1,2 km yeni kanalizasiya xətti çəkilib.
Kanalizasiya şəbəkəsi üzrə 17 km-dən artıq xətt xüsusi təyinatlı maşınla yuyularaq təmizlənib, 1458 abonent sayğacla təmin edilib ki, bununla da sayğaclı abonentlərin sayı 84 214-ə çatıb.
Bundan başqa ötən il ərzində 45 ədəd çoxmərtəbəli yaşayış binasının zirzəmisində 800 metrə yaxın kanalizasiya xətləri dəyişdirilərək əsaslı təmir olunub.
Qeyd edək ki, Suraxanı Rayon Sukanal İdarəsi rayon üzrə 300 min nəfərdən artıq əhali olmaqla 662 km-ə yaxın su və 276 km uzunluğunda kanalizasiya şəbəkəsinə xidmət göstərir.
Bizi Telegram-da izləyin...
