Həftənin birinci günü axşam saatlarında... - Əhali məlumatlandırılıb

 19:58 03.07.2020     5633

Saatlı rayonu ərazisində 57 min hektar suvarılan əkin sahəsi var. Bu sahələrin su təminatı əsasən Araz çayı üzərində yerləşən və 6 rayonun 170 min hektar sahəsinə xidmət edən, Bəhrəmtəpə hidroqovşağından başlanğıcını götürən Baş Muğan və ondan ayrılan kanallar, eyni zamanda Kür və Araz çayları üzərində yerləşən nasos stansiyaları vasitəsilə həyata keçirilir.

“Meliorasiya və Su Təsərrüfatı” ASC-dən Redaktor.az-a verilən məlumata görə, xidmət etdiyi əkin sahələri nəzərə alınaraq, rayonlararası su bölgüsü limitləri hazırlanıb və su bölgüsü təsdiq edilmiş limit daxilində verilir. Son vaxtlar Araz çayında suyun sərfi azaldığından digər rayonlarla yanaşı, Saatlı rayonuna verilən suyun həcmi müəyyən qədər azalıb. Rayon ərazisində kəndlərarası su bölgüsü tərtib edilmiş qrafik əsasında aparılır. Bu səbəbdən bir sıra kəndlərdə su təminatında çətinliklər yaranır.

Yaranmış çətinliklər nəzərə alınaraq, İran İslam Respublikası ilə birgə istismar olunan Araz su anbarından buraxılan suyun həcmi artırılıb və növbəti həftənin 1-ci günü axşam saatlarından rayona tələbata uyğun suyun verilməsi təmin ediləcək. Qeyd olunanlar barədə rayon rəhbərliyi, Dövlət Aqrar İnkişaf Mərkəzi və su istifadəçiləri məlumatlandırılıb.

Rayonun Nabatkənd və Çolpu kəndlərinə kommunal-məişət ehtiyacları üçün suyun verilməsinin təcili bərpa edilməsi barədə yerli istismar idarəsinə ciddi tapşırıq verilib. Hazırda bu istiqamətdə işlər aparılır və iş nəzarətə götürülüb.