Zorakılığa məruz qalan kişilər komitəyə müraciət etdi

 16:05 07.11.2021     366

Bu ilin 9 ayı ərzində Ailə, Qadın və Uşaq Problemləri üzrə Dövlət Komitəsinə ən müxtəlif zorakılıqlara məruz qalan 255 nəfər müraciət edib.

Redaktor.az   xəbər verir ki, bunu Ailə, Qadın və Uşaq Problemləri üzrə Dövlət Komitəsinin sədri Bahar Muradova deyib.

Sədrin sözlərinə görə, Dövlət Komitəsinin 860 qaynar xəttinə isə 369 müraciət olub:

“Bunlardan yalnız 81-i kişi olub, qalanı qadınlardır. Xüsusən 18-35 yaşlı qadınlar daha çox iqtisadi və psixoloji təzyiqə məruz qaldıqlarını bildiriblər”.

B. Muradova qeyd edib ki, problemlə üzləşəndə ən müxtəlif dövlət orqanlarına, məhkəmələrə müraciət edən insanlar ailələrində problemlər olanda da müvafiq qurumlara müraciət edə bilərlər:

“Burada qəbahət heç nə yoxdur. İnsanların əksəriyyəti düşünür ki, ailələrində baş verən bu və ya digər hadisə ilə bağlı müvafiq qurumlara müraciət etmək olmaz. Ancaq müvafiq dövlət qurumları məhz insanların problemlərini həll etmək üçün yaranmış orqanlardır. Məsələn, Dövlət Komitəsinin rayonlarda mərkəzləri var və həmin mərkəzlər bu məsələlərlə məşğul olurlar” (apa).