Polad Bülbüloğlu Dağıstana niyə gedib?

 23:28 12.11.2021     106

Noyabrın 12-də Azərbaycanın Rusiyadakı səfiri Polad Bülbüloğlu Rusiya Federasiyasının Dağıstan Respublikasına səfər edib.

Səfirlikdən Redaktor.az-a daxil olan məlumata görə, P.Bülbüloğlu Dağıstanın rəhbəri Sergey Melikov, respublikanın keçmiş rəhbəri Maqomedali Maqomedov, eləcə də SSRİ xalq artisti, görkəmli bəstəkar və drijor Murad Kajlayevlə görüşüb.

S.Melikovla görüş zamanı Azərbaycanla Dağıstan arasında əməkdaşlıq münasibətlərinin inkişaf perspektivləri, eləcə də Yaraq-Qazmalar (Rusiya Federasiyası) – Samur (Azərbaycan Respublikası) dövlət sərhəd keçid məntəqəsi ərazisində mövcud vəziyyət müzakirə olunub.

Polad Bülbüloğlu Dağıstanın rəhbərini ölkəmizə səfərə dəvət edib.

Azərbaycan Respublikasının Prezidenti İlham Əliyevin müvafiq sərəncamlarına əsasən, Rusiya Federasiyasının Dağıstan Respublikasının uzun illər rəhbəri olmuş, ümummilli lider Heydər Əliyevlə birgə çalışmış Maqomedali Maqomedov “Dostluq” ordeni və SSRİ xalq artisti, görkəmli bəstəkar və dirijor, uşaqlıq və gənclik illəri Azərbaycanda keçmiş Murad Kajlayev “Azərbaycan Respublikası Prezidentinin fəxri diplomu” ilə təltif ediliblər.

M.Maqomedovla görüşdə Azərbaycanın Səfiri prezident İlham Əliyevin sərəncamlarına əsasən "Dostluq" ordeni ali mükafatını ünvan sahibinə təqdim edib, ölkələrimiz və xalqlarımız arasında dostluq və əməkdaşlıq əlaqələrinin inkişafında xüsusi xidmətlərini qeyd edərək ona Azərbaycan Prezidentinin təbrikini çatdırıb.

M.Maqomedov xalqımız, ümummilli lider Heydər Əliyev haqqında yüksək fikirlər söyləyərək, onunla birgə çalışdığı illəri xatırlayıb. Həmçinin, Azərbaycanın 90-cı illərdə üzləşdiyi çətinlikləri yada salaraq qeyd edib ki, məhz Ulu Öndər Heydər Əliyev ölkəmizi düşdüyü ağır vəziyyətdən çıxarmış və Azərbaycan inkişaf yoluna qədəm qoymuşdur. M.Maqomrdov bu gün də bu yolun prezident İlham Əliyev tərəfindən layiqincə davam etdirildiyini vurğulayıb.

M.Maqomedov göstərilmiş yüksək diqqətə görə dövlət başçımıza öz dərin təşəkkürünü bildirib.

M.Kajlayevə Azərbaycan prezidentinin fəxri diplomunun təqdimetmə mərasimi “Xüsusi istedadlı uşaqlar üçün M.Kajlayev adına Respublika İncəsənət Məktəbi”ndə keçirilib.

Məktəb xorunun ifasında öncə Azərbaycan, Rusiya və Dağıstanın himnləri səsləndirilib. Daha sonra isə Polad Bülbüloğlunun “Eşq və ölüm” baletindən musiqi parçaları, eləcə də Tofiq Quliyevin Bakı haqqında mahnısı ifa olunub.

Səfir Prezident İlham Əliyevin Murad Kajlayevə ünvanlanmış təbrik məktubunu oxuyaraq Prezidentin yubilyara xoş arzularını çatdırıb.

Öz növbəsində M.Kajlayev prezident İlham Əliyevin ünvanına xoş sözlər səsləndirib və ona dərin təşəkkürünü bildirərək, Bakı ilə bağlı əziz xatirələrini bölüşüb.
Bundan əlavə, bəstəkar şəxsi arxivindən vaxtilə rəhbərlik etdiyi orkestrin “akademik” statusu alması ilə bağlı ümummilli lider Heydər Əliyevin ona ünvanladığı 1993-cü ilə aid təbrik məktubunu Polad Bülbüloğluna təqdim edib. Səfir sözügedən əmanəti Heydər Əliyev Fonduna təqdim edəcəyini bildirib.

M.Maqomedov və M.Kajlayev ilə keçirilmiş görüşlərdə Dağıstanın rəhbəri Sergey Melikov da iştirak edib.