Azərbaycanda korrupsiyaya son qoyulacaq? - Deputatdan AÇIQLAMA

 12:48 05.04.2022     14154

Prezident İlham Əliyev “Korrupsiyaya qarşı mübarizənin gücləndirilməsinə dair 2022─2026-cı illər üçün Milli Fəaliyyət Planı”nın təsdiq edilməsi haqqında Sərəncam imzalayıb. Sənədə əsasən, “Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı” təsdiq edilib.

Bəs bu sərəncamdan sonra ölkədə rüşvətin, korrupsiyanın tamamilə başa çatacağını gözləmək olarmı?

Mövzu barədə Redaktor.az-a danışan Milli Məclisin deputatı Fazil Mustafa qeyd etdi ki, əvvəllər də bu istiqamətdə sənədlər qəbul olunub:

“Bu sənədlər korrupsiyaya qarşı mübarizənin vacib atributlarından biridir ki, vaxtaşırı bu məsələ ilə bağlı dövlətin apardığı siyasətin önəmini göstərir. Yəni bu sahəyə yetirilən diqqətin vacibliyini burada qəbul edirik. Hesab edirəm ki, korrupsiyaya qarşı mübarizə daim aparılmalıdır. Hər hansı bir şəkildə səngimək olmaz. Çünki bu, gündəlik təzahürdür. İnsanların, xüsusilə də məmurların bu alışqanlığını dəyişmək mümkün deyil. Hər an ortaya böyük problemlər çıxara bilər. Büdcənin talan olunmasından tutmuş, layihələrin sıradan çıxarılmasına qədər korrupsiya elementləri daha açıq görünür. Hətta bəzən ordu quruculuğunda - Müdafiə Nazirliyində qədər korrupsiya elementləri aşkara çıxarıldı. Bunlar hamısı ardıcıl həyata keçirilməli məsələlərdir”.

Deputat bildirdi ki, korrupsiyanın birdəfəlik dayandırılması digər dünya dövlətlərində də mümkün deyil:

“Korrupsiya birdəfəflik harada dayandırıla bilər ki? Dünyanın heç yerində korrupsiya bitmir. Amerikada, Avropanın hansı ölkəsində korrupsiya dayandırılıb? Bu, mübarizədir. Bu mübarizədə də, söhbət korrupsiyanı minimuma endirməkdən gedir”. 

Zərif Ülviqızı