Hava niyə soyuqdur? – AÇIQLAMA

 12:23 08.05.2022     2217

Ötən gün ərzində Türkiyədən hərəkət edən siklon və siklonla bağlı soyuq atmosfer cəbhələrinin ölkə ərazisindən keçməsi nəticəsində respublikanın əksər rayonlarında hava şəraiti yağıntılı keçib.

Redaktor.az xəbər verir ki, bunu Milli Hidrometeorologiya Xidmətinin rəisi Umayra Tağıyeva deyib.

Onun sözlərinə görə, bəzi ərazilərdə, əsasən dağlıq və dağətəyi rayonlarda yağıntılar intensiv, leysan xarakterli və güclü olub. Düşən yağıntının miqdarı Böyük Qafqazın rayonlarında – Balakəndə, Qaxda, Zaqatala, Şəkidə, Oğuzda, Qəbələdə aylıq normanın 57 faizinədək olub. Düşən yağıntının miqdarı 71 mm-dək olub.

U.Tağıyeva qeyd edib ki, intensiv yağıntılar nəticəsində respublikanın çaylarında da sululuq artıb. Belə ki, çaylarda suyun səviyyəsi 23 sm-dən 49 sm-dək yüksəlib.

Bundan əlavə, respublikanın yüksək dağlıq ərazilər qar qeydə alınıb. Şahdağda qar örtüyünün hündürlüyü 18 sm-ə çatıb.