DİN porno saytlara girənləri cərimələyir? - AÇIQLAMA

 14:02 20.05.2022     3265

Azərbaycanda bəzi porno saytlara giriş etdikdə ekrana Daxili İşlər Nazirliyi (DİN) tərəfindən cərimə olunmaqları barədə xəbərdarlıq mesajları gəlir. Bu barədə bəzi sosial şəbəkə istifadəçiləri məlumat paylaşıb.

Belə ki, mesajda istifadəçiyə pedofiliya elementləri, zorakılıq və homoseksualizm təbliğatlı pornoqrafik saytlara dəfələrlə girdiyi üçün blok olunduğu və blokdan çıxmaq üçün 100 manat cərimə ödənilməsi tələb edilir. Cərimənin ödənilməsi üçün hesab nömrəsi də göstərilir. 

Hətta deyilənə görə, bu cəriməni qeyd olunan hesaba ödəyən insanlar da az deyil.

Xatırladaq ki, bu məsələ bir neçə il öncə araşdırılmış və DİN-dən bildirilmişdi ki, bu cərimələrin nazirliklə heç bir əlaqəsi yoxdur. Yəni vətəndaşları cərimələyən DİN yox, dələduzlardır. Amma bu məsələ bir neçə il öncə araşdırılsa da, bu problem hələ də qalmaqdadır.

Maraqlıdır DİN niyə hələ də onların adından istifadə edən bu şəxsləri tapa bilmir? İnternet istifadəçiləri bu cür dələduzlardan necə qorunsunlar?

Redaktor.az-ın sorğusuna cavab olaraq DİN Mətbuat xidmətinin bölmə rəisi, polis baş leytenantı Zeyni Hüseynov bildirdi ki, belə dələduzluq halları bir neçə il əvvəl də müşahidə edilib:

“Həmin vaxt və ondan sonrakı müddətdə Daxili İşlər Nazirliyi tərəfindən müvafiq araşdırma aparılıb və bu əməli törədənlər ifşa edilərək qanunvericilikdə nəzərdə tutulmuş qaydada cəzalandırılıblar. Lakin yeni dələduzlar ortaya çıxır. Buna görə də bu cür mesajların qarşısını birdəfəlik almaq mümkün deyil.

Ona görə də vətəndaşlarımızın internet resurslarından təhlükəsiz istifadə etmələri, o cümlədən kibercinayətkarlıq halları ilə üzləşməmələri üçün dəfələrlə KİV və sosial şəbəkələr vasitəsilə maarifləndirici postlar paylaşaraq bu halların necə baş verməsi barədə məlumatlar veririk.

Fürsətdən istifadə edib bir daha diqqətə çatdırırıq ki,  vətəndaşlarımız bu tipli mesajlara inanmasınlar və heç bir halda ödəniş etməsinlər. Belə halla rastlaşdıqda isə Nazirliyin "102" Xidməti-Zəng Mərkəzinə, eləcə də sosial şəbəkələrdəki səhifələrinə məlumat versinlər”.

Rəqəmsal İnkişaf və Nəqliyyat Nazirliyinin Rəqəmsallaşma sahəsində ictimaiyyətlə əlaqələr üzrə meneceri Vüsalə Səid Əyyubqızı isə dedi ki, ödəniş etmədən müvafiq qurumdan dəqiqləşdirmək lazımdır:

“Vətəndaşlara müxtəlif qurum və şirkətlərin adından müraciət edərək onlardan maddi vəsaitin ələ keçirilməsi halları ilə bağlı mütəmadi olaraq maarifləndirmə tədbirləri həyata keçirilir. Vətəndaşlara bu kimi kiberdələduzluq hallarından qorunmaq üçün müraciətin doğruluğunu yoxlamaq məqsədilə ödəniş etmədən öncə adı çəkilən qurumla əlaqə saxlamaları tövsiyə olunur”.

Zərif Ülviqızı

222