Deputat “Bolt” taksi şirkətindən şikayətləndi: "300-ə yaxın sürücünü işə buraxmırlar"
“"Bolt" taksi xidmətinin sürücülərini xahişləri üzrə Parlamentdə qəbul etdim. İlk növbədə Parlamentin sədri Sahibə xanım Qafarovaya görüşlər üçün deputatlara yaratdığı şəraitə görə təşəkkürümü bildirirəm. Parlamentə ümid yeri bilib gəlirlərsə, mütləq dinləmək və qanunvericilik səviyyəsində köməklik etmək lazımdır”.
Redaktor.az xəbər verir ki, bu barədə Milli Məclisin deputatı Razi Nurullayev şəxsi feysbuk səhifəsində yazıb.
O bildirib ki, taksi sürücüləri ilə xeyli söhbət edərək, onların narahatlıqlarını dinləyib:
“Onların xeyli haqlı olduqları məqamlar var. Bunlardan biri 8 saatdan çox işləməkdir. Məncə bu məsələni şirkətlər sistemli həll etməlidir ki, sürücü istəsə belə işləyə bilməsin. Çünki, həm özünü, həm də sərnişini təhlükəyə atır. Lakin, gərək sürücü ailəsini saxlaya biləcək qədər də qazanc götürsün.
İkinci haqlı məqam isə 300-ə yaxın sürücünün şikayət və narazılıq etdiyinə görə şirkət tərəfindən bloklanması və işə buraxılmamasıdır. Bunu hansı qanun əsasında edirlər, başa düşülən deyil. Ona görə də aidiyyəti qurumlar gərək bunu araşdırıb onların hüququnu bərpa etsin”.
Millət vəkilinin fikrincə, əslində, hökumət bu məsələni tənzimləyə bilər:
“Amma, bu ciddi sosial narazılıq yarada bilər deyə etmirlər və mən bunu doğru sayıram. Taksi xidməti bir sosial layihədir və 60 000 şəxs ailəsini dolandırır. Sərnişinlər də normal qiymətə istifadə edə bilir. Bu gün taksi yalnız varlılar üçün deyil, kasıblar da yararlana bilir. Ona görə də bu məsələ bir az diqqətdən kənarda qalıb. Amma, müəyyən addımların atılmasına ehtiyac var ki, heç bir tərəf ziyan çəkmədən məsələlər tənzimlənsin.
İstərdim ki, taksi xidməti sahibkarları ilə də bir görüş keçirək və onları da dinləyək. Məsələləri başlı-başına buraxmaq olmaz və həll edilməlidir ki, sabaha saxlamayaq. O qədər problemləri sabah, sabah deyib konservləşdirmişik ki, bu gün altından çıxa bilmirik".
Zərif Ülviqızı
Bizi Telegram-da izləyin...
