Naxçıvanda həkimlər etiraz aksiyası keçirdi - VİDEO
“İnsanlar gözləyir, belə bir problemləri yoxdur, iclas keçiriləcək”.
Redaktor.az xəbər verir ki, bu sözləri Naxçıvanın səhiyyə naziri Niyazi Novruzov bu gün Diaqnostika Müalicə Mərkəzinin həkimlərinin keçirdikləri aksiya ilə bağlı açıqlamasında bildirib.
Qeyd edək ki, bu gün Naxçıvan Diaqnostika Müalicə Mərkəzinin həkimləri etiraz aksiyası keçiriblər.
Etiraza səbəb həkimlərə nəzərdə tutulan sığorta ödənişlərinin verilməməsi olub.
Nəticədə onlar xəstə qəbulunu dayandırıblar. Həkimlər APA-ya bildiriblər ki, son iki-üç ayda Diaqnostika Müalicə Mərkəzinin həkimləri 600 min manat dəyərində sığortalı xəstə qəbul ediblər. Lakin onlara icbari tibbi sığorta haqqında qanunla nəzərdə tutulan əlavə ödənişlər verilməyib.
Belə olacağı təqdirdə, həkimlər aksiyalarını növbəti günlərdə də davam etdirəcəklərini bildiriblər.
Naxçıvan Muxtar Respublikasının İcbari Tibbi Sığorta üzrə Dövlət Agentliyinin icbari tibbi sığorta işinin təşkili və qeydiyyat şöbəsinin müdiri Elnur İbrahimov bildirib ki, muxtar respublikada bütün səhiyyə ocaqlarına sığorta ödənişləri xidmətlər zərfinə uyğun olaraq hər ay tam şəkildə ödənilib.
Səhiyyə Nazirliyinin aparat rəhbəri Vüqar Babayev isə etirazın olduğunu təsdiq edib:
“Bəli, dünən həkimlərin bəziləri bu məsələ ilə bağlı etiraz ediblər. Onlarla artıq görüş keçirmişik. Diaqnostika Mərkəzi yenidən Səhiyyə Nazirliyinin balansına qaytarılır. Bununla əlaqədar olaraq orada təhvil-təslim işləri gedir. Bu məsələlər həll olunduqdan sonra həkimlərə qanuna uyğun olaraq əlavə ödənişlərin verilməsi təmin ediləcək”.
Daha ətraflı Baku TV-nin süjetində:
Bizi Telegram-da izləyin...
