ABŞ-da Xocalı ilə bağlı mühüm qərar verildi
ABŞ-ın Mayami-Deyd dairəsində fevralın 26-sı Xocalının Anım Günü elan edilib.
Bu barədə Redaktor.az-a Diasporla İş üzrə Dövlət Komitəsindən məlumat verilib.
Bildirilib ki, bu barədə Mayami-Deyd dairəsinin meri Daniella Levin Kava və Mayami-Deyd dairəsinin Komissarlar Şurasının sədri III Oliver G. Gilbert Bəyannamə imzalayıb.
ABŞ-ın keçmiş baş prokuroru Robert Frensis Kennedinin “Bəşəriyyətin tarixi saysız-hesabsız müxtəlif cəsarət və iman əməllərindən formalaşır. İnsan hər dəfə bir idealı müdafiə edəndə və ya başqalarının vəziyyətini yaxşılaşdırmaq üçün hərəkət edəndə və ya ədalətsizliyə qarşı mübarizə apardıqda, incə bir ümid dalğası göndərir” fikri ilə başlayan bəyannamədə bildirilib ki, 1992-cı il fevralın 25-dən 26-na keçən gecə Azərbaycanın Xocalı şəhər əhalisinin qətliama məruz qalması nəticəsində aralarında çoxlu uşağın, qadının və ahılın olduğu 600-dən çox dinc və günahsız mülki şəxs qətlə yetirilib. Nəzərə çatdırılıb ki, insan haqları üzrə məşhur beynəlxalq təşkilatlar, o cümlədən “Human Rights Watch” bu faciəni bölgənin ən böyük qırğını adlandırıb.
Xocalı faciəsini “müharibə dövründə törədilən dəhşətli dağıntıların və bütün dünyada insanlar arasında daha çox anlaşma, ünsiyyət və tolerantlığa olan davamlı ehtiyacının ayıq bir xatırlatması” kimi səciyyələndirən bəyannamə müəllifləri Mayami-Deyd dairəsində, Florida ştatında və bütün dünyada yaşayan azərbaycanlıların hər il Xocalı qurbanlarının xatirəsini ehtiramla yad etdiklərini vurğulayıblar.
Bəyannamə müəllifləri Mayami-Deyd dairəsi adından fevralın 26-nı Xocalının Anım Günü elan ediblər və xeyirxah insanları Xocalı soyqırımının 31-ci ildönümünü yad etmək üçün yerli hakimiyyət nümayəndələrinə qoşulmağa çağırıblar.
Qeyd edək ki, Bəyannamə Florida ştatında fəaliyyət göstərən Azərbaycan-Amerika Gənclər Assosiasiyasının rəhbəri Nabat Eminovaya təqdim edilib.
Bizi Telegram-da izləyin...
