Quru sərhədlərimiz açılacaq? - Deputat: "Operativ Qərargah yaxın zamanda qüvvədə olan qadağaları ləğv edəcək"
Xəbər verdiyimiz kimi, bu gün Ümumdünya Səhiyyə Təşkilatı (ÜST) 2020-ci ildən qüvvədə olan COVID-19 üçün qlobal fövqəladə vəziyyətin sona çatdığını elan edib.
Qeyd edək ki, aprelin 19-da Nazirlər Kabinetinin verdiyi qərara əsasən, koronavirus (COVID-19) infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə Azərbaycan ərazisində xüsusi karantin rejiminin müddəti 2023-cü ilin 1 iyul saat 06:00-dək uzadılıb.
Hazırda ölkəmizdə xüsusi karantin rejimi ilə əlaqədar yalnız quru sərhədlərimiz bağlıdır.
Bəs, ÜST-ün bu qərarından sonra Azərbaycanda xüsusi karantin rejimi tamamilə ləğv edilərək sərhədlər açılacaqmı?
Mövzu ilə bağlı Milli Məclisin Əmək və sosial siyasət komitəsinin sədr müavini, deputat Məlahət İbrahimqızı Redaktor.az-a danışıb.
O bildiridi ki, ÜST-ün qərarı çox sevindirici oldu:
"Növbəti pandemiyaların baş verəcəyi ilə bağlı şayiələr yayılırdı. ÜST-ün pandemiya ləğvi ilə bağlı bu açıqlaması isə insanlar arasındakı narahatlığı aradan qaldıracaq. Hər ölkə pandemiya ilə bağlı qadağalar tərtib etmişdi. Azərbaycanda bu qadağaların müəyyən hissəsi hələ də qüvvədə idi. ÜST-ün bu açıqlamasından sonra düşünürəm ki, Nazirlər Kabineti yanında Operativ Qərargah yaxın zamanda qüvvədə olan qadağaları ləğv edəcək. Quru sərhədlər də pandemiya səbəbindən bağlandığı üçün, açılacağı gözləniləndir".
Humay İSGƏNDƏRLİ
Bizi Telegram-da izləyin...
