Komitə sədri şahmat turnirinin açılışında çıxış etdi
Millət vəkili, Milli Məclisin Mədəniyyət Komitəsinin sədri Fazil Mustafa, bu Komitənin sədri olmuş mərhum Millət vəkili Qənirə xanım Paşayevanın xatirəsinə həsr edilmiş şahmat turnirinin açılış törənində çıxış edib, ürək sözlərini bölüşüb.
Redaktor.az xəbər verir ki, turnir "Nəfəs" İctimai Birliyinin və "Məmmədyarovlar Şahmat Məktəbi”nin birgə təşkilatçılığı, Azərbaycan Şahmat Federasiyasının dəstəyi ilə keçirilir.
"Ramada by Wyndham Baku"da baş tutan turnirdə Qənirə Paşayevanın xatirəsinə hazırlanmış video-çarx nümayişi olunub.
Açılış törənində həmçinin, qadınlar arasında beynəlxalq qrosmeyster, “Məmmədyarovlar Şahmat Məktəbi”nin rəhbəri Zeynəb Məmmədyarova, Azərbaycan Şahmat Federasiyasının vitse-prezidenti Faiq Həsənov, Millət vəkili Arzu Nağıyev, Əməkdar idman ustası, qazi İlham Zəkiyev, “Regional Hüquqi və İqtisadi Maarifləndirmə” İB sədri Arzu Bağırova, “NƏFƏS” İB sədri Firəngiz Balakişiyeva və (ailə adından) Qənirə Paşayevanın qardaşı Aslan Paşayev çıxış edib.
Açılış törəninin ardınca Fazil Mustafa və digər rəsmi qonaqlar lider masalara yaxınlaşıb, “ilk gediş” ediblər və sonra turnir start götürüb.
Qeyd edək ki, turnir dekabrın 21-dək davam edəcək.
Bizi Telegram-da izləyin...
