Şamaxıda "Səyyar qəbul otağı" təşkil olundu
![](https://img.redaktor.az/news/2024/02/photo_232508.jpg?v=MDM6NDcyMDI0LTAyLTIxIDE3OjQwOjM0)
"Mənə məxsus obyektin qaz sayğacı 250 metr məsafədən keçən qaz xəttinin yaxınlığında quraşdırılıb. Qaz sayğacının yerinin dəyişdirilərək obyektin yaxınlığında quraşdırılmasını sizdən xahiş edirəm".
Redaktor.az xəbər verir ki, bu sözləri karxana fəaliyyəti ilə məşğul olan Qara Bədəlov Şamaxı rayonunda "Azəriqaz" əməkdaşlarının sahibkarlarla keçirilən görüşü zamanı bildirib.
Sahibkarlarla yanaşı, sakinlər də "Səyyar qəbul otağı"nın imkanlarından yararlanıblar. Mikrofon önünə keçən Nizami Zülfüqarov rayonun Şəhriyar qəsəbəsində yerləşən fərdi yaşayış evinin qazlaşdırılmasını xahiş edib. Elşən Zülfüqarovun müraciəti isə dəymiş ziyanla əlaqədar hesablanmış məbləğə yenidən baxılması ilə bağlı olub. Görüş zamanı həm sahibkarların, həm də sakinlərin ünvanladıqları suallar Birliyin məsul şəxsləri tərəfindən cavablandırılıb.
Məlumat üçün bildirək ki, görüşdə Birlik rəsmiləri ilə yanaşı, Kiçik və Orta Biznesin İnkişafı Agentliyinin məsul şəxsləri də iştirak ediblər.