“Bələdiyyələrin statusu haqqında” qanuna dəyişiklik TƏSDİQLƏNDİ
Azərbaycanda yeni seçiləcək bələdiyyənin tərkibinin ilk iclasının keçirilməsi və sədrin seçilməsi ilə bağlı yeni qaydalar üçüncü oxunuşda təsdiqlənib.
Redaktor.az xəbər verir ki, bununla bağlı “Bələdiyyələrin statusu haqqında” qanuna təklif olunan dəyişiklik parlamentin bugünkü plenar iclasda müzakirəyə çıxarılıb.
Layihəyə əsasən, yeni seçilən bələdiyyənin ilk iclası Mərkəzi Seçki Komissiyası tərəfindən bələdiyyə seçkilərinin yekunları elan edildikdən sonra 5 iş günü müddətində keçiriləcək.
Bələdiyyənin ilk iclasında bələdiyyənin sədri seçilənədək yaşı daha çox olan üzv iclasa sədrlik edəcək. İclasa sədrlik edən bələdiyyəyə üzv seçilmiş şəxslərin siyahısını elan edəcək, ilk iclası bələdiyyə sədri və iclas katibi seçilənədək aparacaq.
Bələdiyyənin sədri açıq və ya gizli səsvermə yolu ilə seçiləcək. Bələdiyyənin sədri bələdiyyə üzvlərinin yarısından çoxunun səsini topladıqda seçilmiş hesab olunacaq. Bələdiyyənin ilk iclasında bələdiyyə sədri və iclas katibi seçildikdən sonra iclasın gündəliyi təsdiq ediləcək.
Layihə səsverməyə çıxarılaraq qəbul edilib.
Bizi Telegram-da izləyin...
