"Hər gün məzarını ziyarət edirəm, heç nə dəyişməyib" - Aprel şəhidinin atası
Xəbər verdiyimiz kimi, bu gün 2016-cı il Şanlı aprel döyüşlərindən 9 il ötür. Bu günasibətlə şəhidlərimizin məzarları ziyarət edilir.
Redaktor.az-a açıqlamasında şəhid Fəxrəddin Qurbanlının atası Seyfəddin Qurbanlı şəhidin məzarını ziyarət etdiklərini bildirib:
"Bu gün tədbir keçirdik, Fəxrəddinin məzarını ziyarət etdik. Tədbirdə rayon rəsmiləri, Fəxrəddinin məzunu olduğu universitetin tələbələri və şəhid ailələri iştirak etdilər. İndi də evimizdə ehsan veririk. Zəhmət çəkib gələn hər kəs sağ olsun. Doqquz il ötür, amma bizim üçün heç nə dəyişməyib. Fəxrəddin elə bir insan idi ki, onun yerini heç nə əvəz edə bilməz. Doqquz ildir ki, hər gün məzarını ziyarət edirəm, onunla söhbətləşirəm. Bu da Allahın işidir. Allah cəmi şəhidlərimizə rəhmət eləsin!".
Xatırladaq ki, Şəhidimiz Fəxrəddin Qurbanlı 1994-cü ilin bu günü Bakı şəhərində anadan olub. Qorxmaz Baxşıyev adına 179 saylı orta məktəbi bitirib. 2011-ci ildə Azərbaycan Universitetinin Sosial iş fakulitəsinə qəbul olunub. Universitetin ən yüksək təqaüt alan tələbəsi olub. Ali təhsilini başa vurduqdan sonra 2015-ci ilin iyul ayında hərbi xidmətə yollanıb. Tərtərdə xidmət edən Fəxrəddin aprel döyüşlərində qəhrəmancasına Şəhid olub. Aprelin 9-da Şəhid əsgərimiz böyük izdihamla dəfn edilib.
Vasif ƏLİHÜSEYN
Bizi Telegram-da izləyin...
