"Dünyada cəmi 2-3 ölkə bütün internetə nəzarət edə bilər" - Təbriz Cəfərov
“Süni intellektdən asılılıq, xüsusilə də koqnitiv asılılıq məsələsinə diqqət yetirmək lazımdır”.
Redaktor.az xəbər verir ki, bunu “EYBA-nın 2026-cı il Payız Konfransı”nda ADA Universitetinin Hüquq fakültəsinin dosenti Təbriz Cəfərov diqqətə çatdırdı.
“Çıxışımın əsas hissəsinə keçməzdən əvvəl hamınızın diqqətini süni intellekt dövründə baş verən son proseslərə yönəltmək istərdim. Bir tərəfdən, dövlətlər süni intellekt sahəsində öz maraqlarına uyğun təşkilatlar və qurumlar yaratmağa başlayıblar. Digər tərəfdən isə Çin süni intellektdən öz maraqları naminə daha güclü istifadə etmək və bu sahəni tənzimləmək üçün yeni institusional mexanizmlər formalaşdırmaq istiqamətində fəaliyyət göstərir. Burada konkret qurumların adları ilə bağlı dəqiqləşdirməyə ehtiyac var”.
Onun sözlərinə görə, biz bu proseslərdən asılılıq məsələsini dərindən anlamalıyıq:
“Ola bilsin ki, dünyada cəmi iki və ya üç ölkə bütün süni intellekt şirkətlərinə nəzarət etmək, onların fəaliyyətini tənzimləmək və internetdə hansı məlumatların əlçatan olacağını müəyyənləşdirmək gücünə malik olsun.
Süni intellektdən necə istifadə etdiyimiz, məlumatların necə idarə olunduğu və bu proseslərə kimin nəzarət etdiyi mühüm məsələlərdir. Çünki məlumatlar həmin ölkələrə və qurumlara ciddi üstünlük qazandıra bilər. Buna görə də bu məsələ xüsusi əhəmiyyət daşıyır.
Bununla yanaşı, tənzimləmənin vacibliyini vurğulayarkən cəmiyyətdə bazar dəyərlərinin əhəmiyyətini də unutmuram. Tənzimləmələr və digər standartlar həm qanunvericilikdə insan hüquqlarının tam qorunmasına və təmin edilməsinə, həm də bazar cəmiyyətinin dəyərlərinə əsaslanmalıdır. Əks halda, bu cür mexanizmlərin legitimliyi, yəni qanuniliyinin və əsaslılığının qəbul edilməsi sual altında qala bilər”.
Aytəkin TOFİQQIZI
Bizi Telegram-da izləyin...
