"Həmin məbləğ vətəndaş üçün böyük əhəmiyyət daşıya bilər" - Razi Nurullayev
“Mülki Prosessual və İnzibati Prosessual məcəllələrə təqdim olunan dəyişikliklərin məhkəmə sisteminin daha çevik və səmərəli fəaliyyət göstərməsi baxımından mühüm əhəmiyyət daşıdığını qəbul edirəm. Məhkəmə aidiyyəti ilə ərazi aidiyyəti arasındakı fərqlərin dəqiqləşdirilməsi, prosessual qaydaların sistemləşdirilməsi və işlərə baxılma müddətlərinin azaldılması müsbət addımlardır”.
Redaktor.az xəbər verir ki, bunu Milli Məclisin plenar iclasında deputat Razi Nurullayev bildirdi.
O vurğuladı ki, burada bir prinsipial məsələyə xüsusi diqqət yetirmək istəyir:
“Məhkəmə icraatının sürətləndirilməsi vətəndaşın hüquqlarının müdafiəsi hesabına baş verməməlidir. Xüsusilə, ərazi aidiyyəti qaydalarının pozulmasına görə məhkəmə qərarlarının ləğvinin məhdudlaşdırılması məsələsi diqqətlə qiymətləndirilməlidir. Əlbəttə, sırf texniki xarakter daşıyan pozuntular səbəbindən məhkəmə prosesi illərlə uzanmamalıdır. Lakin aidiyyət pozuntusu vətəndaşın qanuni məhkəmədə baxılmaq hüququna, işin obyektiv araşdırılmasına və müdafiə imkanlarına təsir göstərirsə, bu hal hüquqi qiymətləndirmədən kənarda qala bilməz".
Nurullayev qeyd etdi ki, digər məsələ apellyasiya şikayətlərinə tək hakim tərəfindən baxılmasıdır.
"Bu yanaşma iş yükünün azaldılmasına kömək edəcək və mən bunu dəstəkləyirəm. Bununla belə, qərar qəbul edilərkən əsas meyar yalnız sürət deyil, həm də ədalətli araşdırmanın keyfiyyəti olmalıdır. Kiçik iddia üzrə mübahisənin məbləği az ola bilər, amma həmin məbləğ vətəndaş üçün böyük əhəmiyyət daşıya bilər. Maddəyə xüsusi hallar və istisnalar əlavə edilərsə, şərtlər müəyyənləşdirilərsə, daha ədalətli yanaşma olar.
Yazılı icraatın genişləndirilməsi də məqsədəuyğundur. Ancaq tərəflərin dinlənilməsinin vacib olduğu hallarda şifahi baxış və mövqeyini əsaslandırmaq imkanları qorunmalıdır. Bu bəndə də xüsusi hallar, istisnalar və müvafiq şərtlər əlavə olunarsa, daha məqbul hesab edərdim.
Bunları deməkdə əsas prinsipim budur ki, məhkəmə islahatının nəticəsi yalnız daha sürətli qərarlarla deyil, vətəndaşın ədalətə daha asan çıxışı və hüquqlarının daha etibarlı qorunması ilə ölçülməlidir. Bu baxımdan, təklif olunan dəyişikliklərin məhz həmin prinsiplər əsasında dəqiqləşdirilməsini vacib sayıram”, - deyə deputat yekunlaşdırdı.
NURİYYƏ
Bizi Telegram-da izləyin...
