Ana olmadan da analıq etmək olarmış...

Mədəniyyət
 14:34 11.11.2023     414

Qənirə Paşayevasız dünyamızda düşünmək çətinləşsə də, onun sübut etdiyi həqiqətləri bir məcraya toplamağa cəhd etdim.

Özünü cəmiyyətə, insanlara, xalqa, vətənə, dünyaya qurban deyən Qənirə xanım qısa ömrü ilə sübut etdi ki:

• İnsan 48 il yaşamaqla da tarix yazıb, tarixə yazıla bilərmiş;

• 48 illik ömürdə 480 illik əməlləri görmək mümkün imiş;

• Tomrislər, Nüşabələr, Məhsətilər əfsanə deyilmiş;

• İnsan ən dəyərli təbii sərvət imiş;

• İnsan həyatının dəyərini müəyyənləşdirən meyarlar var imiş;

• Cəmiyyət hər kəsə düzgün və dəqiq qiymət verirmiş;

• Vaxtı düz böləndə vaxt çatışmazlığı olmurmuş;

• Səmimiyyət və həssaslıq cəmiyyət tərəfindən qiymətləndirilirmiş;

• El üçün ağlayan göz kor olmurmuş; 

• Vətənpərvərliyi əməldə də etmək mümkündür; 

• İxtisasın olmayan peşənin də ən yüksək zirvəsini fəth etmək olurmuş;

• Ömrün dəyərini insan əməlləri ilə müəyyənləşdirirmiş;

• Gənc və çəlimsiz bir qız deputat etalonu ola bilərmiş;

• Ucqar bir kənddə dünyaya gəlib Fəxri xiyabanda dəfn olunmaq mümkün imiş;

• Ana olmadan da analıq etmək olarmış;

• Azərbaycan qadınının böyük potensialı varmış;

• Bir qadın bir ordunun qüdrətində olarmış;

• Kiçik bir ailənin övladından Böyük Türk dünyasının qızına çevrilmək olarmış;

• Zərif bir xanımın nitqi Türk dünyasını silkələyərmiş;

• Aslanın erkəyi, dişisi olmazmış;

• 44 günlük müharibədə xanımların müstəsna rolu var imiş;

• İnsan xalqa xidmətdən yorulmazmış;

• Əlində bir səlahiyyət olmadan da yüz minlərlə insana kömək etmək olarmış;

• Ömrünü Xocalıya həsr edib Xocalı azad olanda dünyadan köçmək mümkün imiş;

• Vəzifədə olmadan da milyonların səmimi sevgisini qazanmaq mümkün imiş;

• Eyni zamanda həm duyğulu, həm də praqmatik olmaq mümkün imiş;

• Bir insanın dünyadan getməsi ilə böyük bir boşluq yaranarmış;

• Heç də torpağın üzü soyuq deyilmiş;

• İnsan dünyasını dəyişəndən sonra yenidən kəşf edilərmiş;

Fikrət Şiriyev

Filologiya elmləri namizədi, dosent

Bizi Telegram-da izləyin...

© 2024 Redaktor.az.