Mədəniyyət işçilərinin maaşı azaldılacaq? - AÇIQLAMA
Mədəniyyət müəssisələri rəhbərləri və işçilərinin ödəniş dərəcələri aşağı salınacaq.
Redaktor.az xəbər verir ki, bu barədə ötən ay Mədəniyyət Nazirliyi yanında İctimai Şuranın Bakı Şəhər Mədəniyyət Baş İdarəsinə tabe müəssisələr üzrə keçirdiyi ictimai dinləmə zamanı məlum olub.
Xatırladaq ki, sözügedən dinləmələrdə Milli Məclisin Mədəniyyət Komitəsinin sədri Fazil Mustafa, Mədəniyyət Komitəsinin üzvü - Mədəniyyət Nazirliyi yanında İctimai Şuranın sədri, akademik Nizami Cəfərov, İctimai Şuranın üzvləri, Bakı Şəhər Mədəniyyət Baş İdarəsinin rəisi İbrahim Əliyev və idarəyə tabe olan müəssisələrin 300-dən artıq nümayəndələri iştirak ediblər.
Qeyd olunur ki, ödəniş dərəcələrinin aşağı salınmasına Hesablama Palatasının mədəniyyət müəssisələrində apardığı yoxlamalardan sonra qərar verilib.
İctimai dinləmələr zamanı mədəniyyət müəssisələrinin rəhbərləri sözügedən qərara sərt etiraz etsələr də, onlara qərarın Nazirlər Kabineti tərəfindən verildiyi bildirilib.
Məlumata görə, ödəniş dərəcəsinin aşağı salınacağı müəssisələr arasında dövlət büdcəsindən maliyyələşən, paytaxtda və regionlarda fəaliyyət göstərən mədəniyyət evləri, kitabxanalar, uşaq incəsənət məktəbləri, dərnəklər, folklor ansamblları, muzeylər, teatrlar və digər qurumlar var.
Ödəniş dərəcəsinin aşağı salınması nəticəsində mədəniyyət müəssisələri rəhbərləri və işçilərinin maaşlarının azalacağı gözlənilir. Qeyd olunur ki, qərar yaxın aylarda qüvvəyə minəcək.
Qeyd edək ki, sözügedən qulluqçu vəzifələri üçün ödəniş dərəcələri Əmək Məcəlləsinin 57-ci və 156-cı maddələrinin 2-ci hissələrinin tələblərinə uyğun olaraq hazırlanan "Mədəni-maarif, turizm müəssisələrində olan qulluqçu vəzifələrinin Vahid Tarif-İxtisas Sorğu Kitabçası" əsasında tənzimlənir.
Məsələylə bağlı Mədəniyyət Nazirliyinin mətbuat xidmətinin rəhbəri Aynur Kərimova "bakupost"a açıqlamasında bildirib ki, məsələ nazirliyin səlahiyyətləri çərçivəsində həll olunmur:
“Bu bizim nazirliyin səlahiyyətləri çərçivəsində olan məsələ deyil. Bunu biz müəyyənləşdirmirik. Bizdə belə bir məlumat yoxdur”.
Bizi Telegram-da izləyin...
