"Syerra-Leonedə insanlar bir-birini dinləməyi dayandıranda nələrin baş verdiyini çox yaxşı bilirik"
“Mənim adım Musa Kondehdir. Mən Syerra-Leonedən olan gənc fəalam, həmçinin Leading Effective Action for Development təşkilatının həmtəsisçisi və icraçı direktoruyam. Biz gənclərin rəhbərlik etdiyi, onların öz icmalarına rəhbərlik etmələrini və həmin icmaları dəyişdirmələrini dəstəkləyən qeyri-kommersiya təşkilatıyıq”.
Redaktor.az xəbər verir ki, bunu VII Ümumdünya Mədəniyyətlərarası Dialoq Forumunda BMT-nin Sivilizasiyalar Alyansının Gənclərlə Həmrəylik Fondunun təmsilçisi Musa Kondeh dedi.
“Bu gün burada qarşınızda çıxış etmək mənim üçün böyük şərəfdir. Xüsusilə də BMT-nin Sivilizasiyalar Alyansına (UNAOC) yalnız bu platformanı təqdim etdiyinə görə deyil, həm də mənim kimi gənclərə inandığına görə minnətdaram. Mən bu gün sizə öz hekayəmi danışmağa gəlmişəm. Onun cilalanmış, mükəmməl görünən versiyasını deyil, həqiqi hekayəmi.
Bilirsiniz, Syerra-Leonedə insanlar bir-birini dinləməyi dayandıranda nələrin baş verdiyini çox yaxşı bilirik. Ailələr parçalanır, icmalar arasında etimad itir, gələcəklərini qurmalı olan gənclər isə münaqişələrin içində sıxışıb qalırlar. Bu problemlər səbəbsiz yaranmayıb. Çünki biz 1991-ci ildən 2002-ci ilə qədər 11 il davam edən qanlı vətəndaş müharibəsindən keçmişik. Mənim böyüdüyüm reallıq bu idi və mən məhz bu reallığı dəyişdirməyə qərar verdim”, - o bildirdi.
M.Kondeh vurğuladı ki, 2013-cü ildə BMT-nin Sivilizasiyalar Alyansının Gənclərlə Həmrəylik Fonduna (Youth Solidarity Fund) müraciət etmək qərarına gəlib:
“Mən insanları onların artıq sevdikləri və yaxşı başa düşdükləri vasitələrlə bir araya gətirmək üçün sadə bir ideya təqdim etdim. Bu vasitələr dialoq, futbol və incəsənət vasitəsilə dram idi. Məqsədimiz müharibənin artıq dağıtdığı etimadı bu vasitələrdən istifadə edərək yenidən qurmaq idi. Qrant almaq bizə nəsib oldu və əsl iş də məhz bundan sonra başladı.
Mən “Sülh və münaqişələrin həlli üçün icmaların cəlb edilməsi” adlı layihənin həyata keçirilməsinə rəhbərlik etdim. Bu, yerli icma səviyyəsində həyata keçirilən, sadə, lakin olduqca təsirli yanaşmaya əsaslanan bir təşəbbüs idi”.
NURİYYƏ
Bizi Telegram-da izləyin...
