Əbülfəs Qarayev İspaniyanın məşhur kanalına müsahibə verib

 18:49 12.04.2019     223

Azərbaycanın mədəniyyət naziri Əbülfəs Qarayev ölkəmizdə səfərdə olan İspaniya Dövlət Televiziyasının “Medina en TVE” proqramının direktoru Bouziane Ahmed Khodjaya müsahibə verib.

Redaktor.az xəbər verir ki, Əbülfəs Qarayev müsahibədə Azərbaycanın tolerant ölkə olduğunu vurğulayaraq müxtəlif dinə mənsub millətlərin burada sülh və əmin-amanlıq içərisində yaşadığını bildirib. Nazir qeyd edib ki, Azərbaycanın tolerantlıq modeli müsəlman dünyası üçün örnək sayılır. Ölkəmizdə bu mövzuda çoxsaylı beynəlxalq konfrans və forumlar keçirilir.

Azərbaycanda mədəniyyət sahəsinin inkişafı və bu sahədə yeniliklər, ölkəmizin ev sahibliyi etdiyi mötəbər tədbirlər barədə danışan nazir İSESCO-nun mədəniyyətlərarası dialoqa dair “Bakı Prosesi” və 2011-ci ildən etibarən iki ildən bir təşkil olunan Dünya Mədəniyyətlərarası Dialoq Forumunun əsas tərəfdaşlarından biri olduğunu diqqətə çatdırıb. O, cari ilin 2-3 may tarixində Bakıda keçiriləcək V Dünya Mədəniyyətlərarası Dialoq Forumu və 30 iyun – 10 iyul tarixlərində gerçəkləşəcək UNESCO-nun Dünya İrs Komitəsinin 43-cü sessiyası barədə məlumat verib.

Əbülfəs Qarayev müsahibəsində Ermənistanın Azərbaycana qarşı hərbi təcavüzü, Dağlıq Qarabağ münaqişəsinin mahiyyəti, 20 faiz torpaqlarımızın işğal edilməsi barədə də danışıb, bu ərazilərdə tarixi-mədəni abidələrimizin dağıdılıb talan edildiyini diqqətə çatdırıb. Qeyd olunub ki, Azərbaycan sülhsevər, sabitliyin bərqərar olduğu ölkədir, amma məruz qaldığı işğalla heç vaxt barışmayacaq.

Sevda Bayramova / REDAKTOR.AZ