UNESCO baş qərargahında Mədəniyyət nazirlərinin birinci forumu keçirilir

 17:05 19.11.2019     374

UNESCO baş qərargahında təşkilatın Baş Konfransının 40-cı sessiyası çərçivəsində Mədəniyyət nazirlərinin birinci forumu işinə başlayıb.

Redaktor.az-ın məlumatına görə, forumda 100-dən çox ölkənin Mədəniyyət nazirləri iştirak edir. 

Forum çərçivəsində “Mədəniyyət və irs – dialoq və sülh üçün bərpa olunan enerji”, “Təhsildə mədəniyyət – insan inkişafı və innovasiya üçün fundamental ölçü”, “Dayanıqlı inkişaf və məşğulluq üçün mədəniyyət və yaradıcılığa investisiya qoyuluşu” və “İctimai məkanda mədəniyyət – sosial və şəhər transformasiyasının təkanverici qüvvəsi” mövzularında dörd panel keçiriləcək.

Forumu açıq elan edən UNESCO baş direktoru Odre Azuley tədbirin əhəmiyyətinə toxunaraq Baş Konfrans çərçivəsində ilk dəfə həyata keçirilən Forumun həm üzv dövlətlər arasında, həm də üzv dövlətlərlə təşkilat arasında əməkdaşlığın inkişafına töhfə verəcəyini qeyd edib.

“Mədəniyyət və irs – dialoq və sülh üçün bərpa olunan enerji” mövzusuna həsr olunmuş paneldə Azərbaycanın Mədəniyyət naziri Əbülfəs Qarayev çıxış edib. Nazir mədəniyyət və mədəni irsin qorunması sahəsində ölkə və beynəlxalq səviyyədə həyata keçirilən tədbirlər barədə məlumat verib, Azərbaycanda müxtəlif etnik və dini mənsubiyyətə malik insanların ənənələrini qoruyub saxlamaqla əsrlərdir sülh şəraitində birgə yaşadıqlarını, həmçinin ölkədə mövcud olan mədəni və dini abidələrin qorunması və bərpasına xüsusi diqqət yetirildiyini, bu sahədə Heydər Əliyev Fondunun və Fondun prezidenti, UNESKO-nun Xoşməramlı səfiri Mehriban Əliyevanın müstəsna rolunu qeyd edib.

Ə.Qarayev, həmçinin mədəniyyətlər və dinlərarası dialoqun inkişafında 2008-ci ildən ölkə başçısının təşəbbüsü ilə həyata keçirilən “Bakı Prosesi”nin rolunu vurğulayaraq bu təşəbbüs çərçivəsində həyata keçirilən Ümumdünya Mədəniyyətlərarası Dialoq Forumlarının mədəni müxtəliflik və dialoqu təşviq etməklə dünyada dayanıqlı inkişafa töhfə verdiyini bildirib.

Birinci paneldə Azərbaycanla yanaşı Əlcəzair, Andorra, Anqola, Benin, Xorvatiya, Nikaraqua, Hindistan, Burkina-Faso, Konqo, Fransa, Şimali Makedoniya, Mavritaniya, Paraqvay və Çinin mədəniyyət sahəsinə məsul nazirləri çıxış edəcək.