“AZGRANATA” yeni əməkdaşlıq müqaviləsi imzaladı - FOTO

 17:21 13.09.2021     441

Kənd Təsərrüfatı Nazirliyinin Üzümçülük və Şərabçılıq Elmi-Tədqiqat İnstitutu və “AZGRANATA” MMC arasında birgə elmi-təcrübi əməkdaşlıq və istehsalın yaradılması haqqında müqavilə imzalanıb.

Redaktor.az xəbər verir ki, müqavilə tədqiqat və elmi fəaliyyət, təcrübə mübadiləsi sahəsində əməkdaşlığın inkişaf etdirilməsini və dərinləşdirilməsini əks etdirir.

Müqaviləyə əsasən tərəflərin əməkdaşları, doktorant və dissertantları üçün bilik və bacarıqların daim artırılması məqsədilə kadr hazırlığını təşkil etmək və gələcək kadr ehtiyaclarının ödənilməsi istiqamətində birgə fəaliyyət göstərilməsi elmi kadrların mübadiləsi və gənc kadrlar üçün qısa və uzun müddətli təlimlərin təşkil edilməsi nəzərdə tutulur. Bundan əlavə olaraq yüksək keyfiyyətli milli şərab brendlərinin istehsalı məqsədilə Azərbaycanın yerli üzüm sortlarının (Mədrəsə, Xindoqni, Bayanşirə, Şirvanşahı, Həməşərə və s.) biokimyəvi texnoloji göstəricilərini müasir metodlar əsasında öyrənilməsi, onların artırılması və becərilməsini həyata keçirilməsi planlaşdırılıb. Eyni zamanda tərəflərə məxsus laboratoriya və təsərrüfat sahələrində əməkdaşlıq çərçivəsində birgə layihələrin hazırlanması və realizə edilməsi, istehsalat və təlimlərin təşkil edilməsi, qabaqcıl metodların inkişafı və tətbiqi üzrə təcrübə mübadiləsi, beynəlxalq innovasiyaların tətbiqi və təşviqatı məqsədilə birgə maraq doğuran seminarların, sərgilərin təşkili, beynəlxalq dequstasiyaların birlikdə hazırlanması, şərabçılıq məhsullarının (süfrə, kəmturş, kəmşirin və desert şərablarının və digər alkoqollu məhsulların) yeni istehsalat texnologiyaların işlənib hazırlanması və mövcud olanların təkmilləşdirilməsi, yeni rəqabətə davamlı içki növlərinin istehsalı, sınağı, tətbiqi, üzümçülük və şərabçılıq tullantılarının üzvi maddələrlə o cümlədən, müalicəvi kosmetik və s. bioloji aktiv maddələrlə zəngin olduğunu nəzərə alaraq, onlardan üzüm yağının alınmasının elmi əsaslarla təşkili, bu istiqamətdə olan inkişaf problemlərinə həsr olunmuş müştərək elmi layihələrin hazırlanıb həyata keçirilməsi, elmi işlərin birgə nəşri, sahənin informasiya təminatı, istehsalatın elmi təminatı, ixtiralara iddia sənədlərinin hazırlanması, innovasiya yönümlü metodların tətbiqi və ölkədə ərzaq bazarının təhlükəsiz məhsullarla təmin edilməsi istiqamətində tədqiqatların aparılması məsələləri də müqavilədə öz əksini tapıb.

İnstitut heyəti ilk öncə İnstitutun Şamaxı Təcrübə Təcrübə Stansiyasında olmuş, üzüm bağına ümümi baxış keçirmiş daha sonra isə əməkdaşlar "AZGRANATA" MMC-nin laboratoriyasına baş çəkmiş, avadanlıqlarla və aparılan analizlərlə, gedən emal prosesləri ilə yaxından tanış olmuşlar. Sonda müəsisənin muzey-dequstasiya zalında müəssisədə hazırlanan şərab nümunələri dequstasiya edilmiş, hazırlanma texnologiyaları haqqında fikir mübadiləsi aparılıb.