“Vizanın qiymətinin aşağı salınması vacibdir” - İqtisadçıdan ŞƏRH
Azərbaycan vizasını Avropa ölkələri vətəndaşına 350 dollara təklif edir.
“Ölkəyə turist axının artırılması üçün vizanın qiymətinin aşağı olması arzuolunandır”.
Bunu İqtisad Universitetinin (UNEC) professoru Elşad Məmmədov Redaktor.az-a açıqlamasında bildirib.
O, vurğulayıb ki, vizanın qiymətinin yüksək olması turizmin inkişafına mane olacaq:
“Viza qiymətini müəyyənləşdirən zaman hansısa təhlilə ehtiyac olmur. Sadəcə hansısa strukturlarda bu resurslar hesabına büdcəyə daha çox gəlirlərin daxil olması məsələsi əsas götürülür. Həmin dövlət qurumları çalışırlar ki, öz istiqamətləri üzrə büdcəyə ödənişlərin həcmini artırsınlar. Nəticədə isə öz missiyalarını yerinə yetirdiklərini düşünürlər. Halbuki bu cür missiya ölkənin iqtisadi inkişafına xidmət etmir.
Turizmin inkişafı üçün ödənişlərin məbləğinin aşağı salınması vacibdir
Turizmin inkişafının dayanıqlılığını başqa cür təmin etmək mümkün deyil. Hazırda mənfi dinamikalar var və ölkəyə turist axını zəifləməkdədir. Ölkəyə turist axının artırılması üçün vizanın qiymətinin aşağı olması arzuolunandır. Turistlər ölkəyə daxil olandan sonra, onların müəyyən xərclərinin çoxalması üçün turizm infrastrukturunu genişləndirmək lazımdır. Dünya təcrübəsinə əsasən, hansısa rüsumların tətbiqi az effektli olur”.
Qeyd edək ki, "Dövlət rüsumu haqqında” qanuna edilən dəyişikliyə əsasən, 2 illik çoxdəfəlik giriş vizalarının rəsmiləşdirilməsi üçün dövlət rüsumu 350 ABŞ dolları təklif edilir.
Gülşən Şərif / Redaktor.az
Bizi Telegram-da izləyin...
