Məktəb direktorlarının şagirddən forma tələb etmək haqqı yoxdur - Nazir

 13:00 27.07.2022     2982

"Azərbaycanda məktəblərdə şagirdlərin hər hansı bir forma geyinməsi ilə bağlı məcburi tələb yoxdur".

Bu sözləri təhsil naziri Emin Əmrullayev keçirdiyi brifinqdə Redaktor.az-ın müxbirinin sualını cavablandırarkən deyib.

Nazir bildirib ki, bu, ayrı-ayrı məktəblərin verəcəyi qərardan asılıdır:

“Əgər məktəb qərar verirsə, valideyn ona uyğun forma seçə bilər. Ancaq heç kimin səlahiyyəti yoxdur ki, məcbur etsin. Formanın mahiyyəti budur ki, hamı bərabər olsun. Heç kim ev mühitini məktəbə daşımasın, kimsə varlı-kasıb olmasına görə fərqlənməsin".

Məktəbli formasının qiyməti barədə danışan nazirin sözlərinə görə, formalarının qiymətini nazirlik yox bazar müəyyən edir. 

"Nazirlik yoxlamayacaq ki, niyə şagird forma geyinməyib. Məktəb qərar verdikdən sonra valideynlərin ona uyğun forma seçməsi məqsəduyğundur”, - deyə nazir əlavə edib.

E.Əmrullayev onu da qeyd edib ki, məktəb direktorlarının şagirddən forma tələb etmək haqqı yoxdur.

Nərmin Vüqarqızı