“Abituriyentlər özəl universitetləri seçmək istəmirlər” - Ekspert
“Azərbaycanda özəl universitetlərə inam azalıb”.
Redaktor.az xəbər verir ki, bu barədə sosial şəbəkədə etdiyi paylaşımda təhsil eksperti Kamran Əsədov qeyd edib. O bildirib ki, hazırda ali məktəblərə ixtisas seçimi davam edir və bu istiqamətdə bir neçə narahatverici məqam var:
“Ali təhsil müəssisələrimizlə bağlı müəyyən problemlər müşahidə edirəm. Hətta ən az bal toplayan abituriyentlər belə özəl universitetləri seçmək istəmirlər. Arqumentləri də bu cürdür: “Özəl universitetin diplomu tanınmır”. Buna görə də insanların özəl ali təhsil müəssisələrinə inamı azdır”.
Müsahibimiz bununla bağlı valideynlər, abituriyentlərə müraciət edib:
“Azərbaycan daxilində olan bütün universitetlərin diplomları ölkədə tanınır. İstər özəl, istərsə də dövlət universitetlərinin diplomları eyni hüquqi qüvvəyə malikdir. İşəgötürən tərəfə sizin haranı bitirməyiniz yox, nəyi bitirməyiniz maraqlıdır. Əsas da bilik və bacarıqlarınızın səviyyəsi önəmlidir”.
Qeyd edək ki, ali təhsil müəssisələrinə tələbə qəbulu müsabiqəsində iştirak etmək üçün ixtisas seçimi sona yaxınlaşır. İxtisas seçimi 28 avqust saat 23:59-dək davam edəcək.
Nərmin VÜQARQIZI
Bizi Telegram-da izləyin...
