AzMİU-nun müəllimləri tərəfindən yeni dərslik hazırlanıb - FOTO
Azərbaycan Memarlıq və İnşaat Universitetinin (AzMİU) müəllimləri tərəfindən ali məktəblər üçün “Dəmiryol nəqliyyatının hərəkət vasitələri” adlı yeni dərslik nəşr olunub.
Bu barədə Redaktor.az-a universitetin Mətbuat xidmətindən məlumat verilib.
Nəqliyyat və logistika kafedrasının müəllimləri - İsrail Eyvazov, Bulud Bağırov, İlham Hüseynov, Afiq Nəzərov, Ramin Abdullayevin həmmüəllifliyi ilə hazırlanan dərslikdə dəmiryol nəqliyyatının əsas xarakterik xüsusiyyətləri araşdırılıb, vahid nəqliyyat sistemində Azərbaycan dəmir yol nəqliyyatının tarixi rolu və əhəmiyyəti göstərilib. Kitabda dəmir yolu nəqliyyatının hərəkət vasitələrinin təyinatı, təsnifatı və konstruktiv özəllikləri haqqında ətraflı məlumatlar da yer alıb. Yük və sərnişin vaqonlarının əsas hissələri, onların konstruksiyası, vaqonların qabariti, texniki göstəricilərinin təyini, şəhər nəqliyyatında istismar olunan vaqonların konstruktiv xüsusiyyətləri, tətbiq olunan müasir texnologiyalar haqqında materiallar metodiki ardıcıllıqla əks olunub.
Dərslik ali məktəblərin “Nəqliyyat mühəndisliyi” və “Logistika və nəqliyyat texnologiyaları mühəndisliyi” ixtisasları üzrə bakalavriat səviyyəsində təhsil alan tələbələri üçün nəzərdə tutulub. Kitabdan, həmçinin dəmir yol nəqliyyatının istehsalat sahələri və müəssisələrində çalışan mütəxəssislər, eləcə də nəqliyyat ixtisaslaşmaları üzrə təhsil olan magistrantlar istifadə edə bilərlər.
Bizi Telegram-da izləyin...
