"Buna nəzarət etmək çətindir, çünki sinif otağının qapısı bağlıdır" - Emin Əmrullayev
"Dövlət və ya özəl təhsil müəssisəsi olmasından asılı olmayaraq təhsildə dövlət nəzarəti daim olmalıdır. Bu müəssisələrdə həm məzmun, həm də tədris baxımından tədrisə dövlət nəzarəti həyata keçirilir".
Redaktor.az xəbər verir ki, bunu elm və təhsil naziri Emin Əmrullayev “Müasir dini təhsil modelləri ənənələr və qlobal çağırışlar kontekstində" mövzusunda elmi praktik konfransda çıxışı zamanı deyib.
"Məzmun dedikdə Azərbaycan ümumi təhsilində dünyəvi təhsil və din haqqında təhsil modeli üzərində davam edirik. Yəni ayrı-ayrı dinlər haqqında Azərbaycan vətəndaşlarına müxtəlif biliklər ötürülür. Bu isə "Həyat bilgisi" fənni çərçivəsində ayrı-ayrı standartlarda öz əkisini tapıb. Eyni zamanda digər önəmli məsələ sinif otağında müəllimin fəaliyyəti və uşaqlarla olan ünsiyyətidir. Buna faktiki nəzarət etmək daha çətindir. Çünki sinif otağının qapısı bağlıdır. Burada çox önəmli məsələ valideynlərin və ictimaiyyətin də nəzarərində olması olduqca vacibdir. Sinif otaqlarında dini təhsil və ya dini təhsil adı altında nə baş verə bilərsə bununla bağlı dövlətin müvafiq qaydada xəbəri olmalıdır. Azərbaycan məktəbləri bu və ya digər niyyətə xidmət edən dini mesajlarla dövlət standartlarını tədris edən bir yerdir. Bunu xüsusi vurğulayım ki, tədris Azərbaycan məktəblərində ayrı-ayrı şəxslərin şəxsi fikirləri əsasında yox, məhz dövlətin müəyyən etdiyi standartlar əsasında aparılır və aparılmalıdır",- deyə nazir söyləyib (ölkə.az).
Bizi Telegram-da izləyin...
