Dünyada yaxşı məktəb nümunələri
Finlandiya məktəbləri şagird mərkəzli yanaşması ilə tanınır. Burada ev tapşırıqları minimuma endirilir, müəllimlər yüksək ixtisaslı olur və sərbəst qərar vermə imkanına malikdirlər. Hər uşağın fərdi inkişafına diqqət yetirilir ki, bu da həm yüksək tədris nəticələri, həm də aşağı stress səviyyəsi ilə nəticələnir.
Redaktor.az xəbər verir ki, bu barədə təhsil eksperti Kamran Əsədov “Education Systems Around the World” – Global Insights for Educators-a istinadla yazıb.
Montessori məktəbləri sərbəst fəaliyyət və özünütəhsilə əsaslanır. Burada fərdi yanaşma, yaradıcı təfəkkürün inkişafı və müxtəlif yaş qruplarının birgə təhsili ön plandadır. Şagirdlər erkən yaşlardan müstəqil düşünmə və problem həll etmə bacarıqlarını inkişaf etdirir.
İsveçrənin beynəlxalq məktəbləri dil biliklərinin inkişafına xüsusi diqqət yetirir. STEM fənləri və müasir texnologiyalar tədrisə inteqrasiya edilir, tələbələr qlobal dəyərlərlə tanış olurlar. Bu məktəblərin məzunları dünyanın hər yerində uğurlu karyera qurmaq imkanı əldə edirlər.
Sinqapurun riyaziyyat məktəblərində dərindən düşünmə və praktiki tətbiqetmə bacarıqları inkişaf etdirilir. Buradakı şagirdlər beynəlxalq riyaziyyat testlərində yüksək nəticələr göstərməklə tanınır.
High Tech High məktəbləri layihə əsaslı tədrisə və texnologiyadan geniş istifadəyə diqqət ayırır. Müəllim və şagirdlər arasında əməkdaşlıq gücləndirilir. Bu yanaşma tələbələrin yaradıcılıq və liderlik bacarıqlarını artırır.
Reggio Emilia məktəblərində dərs prosesi şagirdlərin maraq və ideyalarına uyğun qurulur. Ətraf mühit dərsin ayrılmaz hissəsi kimi qəbul edilir, ailələr tədris prosesinə fəal şəkildə cəlb edilir. Bu yanaşma yaradıcılıq və əməkdaşlıq bacarıqlarını inkişaf etdirir.
Dünya İqtisadi Forumu məktəbləri əsas diqqəti XXI əsr bacarıqlarına yönəldir. Burada tələbələr tənqidi düşüncə, emosional intellekt və innovasiya sahəsində təcrübələr qazanır, qlobal problemlərin həllinə yönəlmiş yanaşmalar öyrənir.
T.İSMAYIL
Bizi Telegram-da izləyin...
