"Süni intellektin müəllimi əvəz edəcəyi fikri absurddur" - Ekspert
Ekspertlərin fikrincə gələcək dövrlərdə süni intellekt müəllimləri əvəz edəcək.
Bəs həqiqətən süni intellekt müəllimi əvəz edə bilər?
Mövzu ilə bağlı Redaktor.az-a danışan təhsil eksperti İlqar Orucov bildirdi ki, bu fikirlə razı deyil.
"Çünki zamanında audi texnikalar, maqnitafonlar yaranan vaxtlar fikirlər var idi ki, proqram mövzuları hazır olaraq ora yüklənə bilər. Danışdıqlarım 40-45 il əvvələ aiddir. O zaman da belə fikirlər olub ki, müəllimlərə ehtiyac olmayacaq. Göründüyü kimi, bunların heç biri müəllimi əvəz edə bilməz. O ki, qaldı süni intellekt, düşünürəm ki, müəllimi əvəz edə bilməz. Bunun səbəbləri var".
Ekspert qeyd etdi ki, müəllim təkcə fərd olaraq mövzunu izah etmir.
"Eyni zamanda, o emosiyalarla, şagirdlərin yaş dövrünə uyğun olaraq onların psixoloji vəziyyətlərinə uyğun mövzuları izah edir. Bütövlükdə süni intellektin müəllimi əvəz edəcəyi fikrinə fikir olaraq hörmət edirəm. Amma bunun canlı müəllimi əvəz edəcəyi fikri absurddur. Təhsildə hansısa məqamlarda süni intellektdən istifadə qaçılmaz olacaq. Amma biz deyək ki, hansısa yeni texnoloji cihazlar vasitəsilə tədris prosesində müəllimi əvəz edə bilmərik. Bu baxımdan birmənalı olaraq süni intellekt müəllimi əvəz edə bilməz. Müəllim pedoqoq olduğu üçün insanı hisslər və dəyərlər var. Şagirdlərin hər birinə müəllim şəxsi yanaşma qoyur. Süni intellekt bunu edib yanaşmanı tətbiq edə bilməz", - deyə İ.Orucov bildirdi.
Aytəkin TOFİQQIZI
Bizi Telegram-da izləyin...
