"Bəzən hansısa xaricdə təhsil şirkətinin göndərdiyi tələbə insan alverinin qurbanı olur" - AÇIQLAMA
Bəzi media resurslarında, eləcə də bəzi xaricdə təhsil şirkətlərinin müvafiq elanlarında vətəndaşlar müxtəlif xarici ölkələrin universitetlərində təhsil almağa təşviq olunur və sonda diplomların tanınacağı ilə bağlı vədlər, hətta zəmanətlər verilir.
Mövzu ilə bağlı təhsil eksperti Elçin Əfəndi Redaktor.az-a bildirdi ki, hər il biz müvafiq olaraq ali təhsil müəssisələrində keçirilən buraxılış imtahanlarında və yaxud da qəbul imtahanlarında xarici təhsil şirkətlərinin baş qaldırdığını görürük.
"Bəzi hallarda valideynlər, eyni zamanda xaricdə təhsil almaq istəyən vətəndaşlarımız bu kimi şirkətlərin qurbanlarına çevrilirlər. Əlbəttə ki, xaricdə təhsil üçün dövlətin xüsusi proqramı var. Bu proqrama qoşulmaq gələcəkdə diplomun tanınması və eyni zamanda gələcəkdə real iş imkanları deməkdir. Bu proqramdan kənar qəbul məsələsinə gəldikdə, hər bir vətəndaş özü xaricdən qəbul ala bilər. Amma xaricdə təhsil şirkətlərinin böyük əksəriyyəti qeyri-qanuni qəbul əsasında Azərbaycan Respublikası vətəndaşlarının xaricdə təhsil almasna imkan yaradır. Nəticə etibarilə təhsili bitirdikdən sonra diplomların tanınması ilə bağlı ciddi sıxıntı yaranır. Bu səbəbdən vətəndaşlar ilk növbədə şirkəti araşdırmalıdırlar. Onların təklif etdiyi universitetlər və ixtisaslar haqqında məlumata sahib olmalıdırlar. Universitetlərin diplomu ölkəmizdə tanınırmı və ya oxuyacaqları ixtisaslar ölkəmiz üçün prioritet hesab olunurmu, bunları bilməlidirlər", - deyə o vurğuladı.
Ekspert hesab edir ki, əyani təhsilə üstünlük verilməlidir. Onun sözlərinə görə, bəzi hallarda həmin şirkətlər vətəndaşları aldadaraq qiyabi və ya distant təhsil təklif edirlər ki, vətəndaşlar da bu fikirlərlə razılaşır və nəticədə diplomları tanınmır:
"Yaxşı olar ki, belə şirkətlər haqqında vətəndaşlara qarşı hər hansısa bir dələduzluq halı baş verərsə, aidiyyəti üzrə hüquq-mühafizə orqanlarına məlumat verilsin. Vaxtında qabaqlayıcı tədbir alınsın. Əks halda, bir çox hallarda başqa məsələlər də müşahidə edirik. Bəzən hansısa xaricdə təhsil şirkətlərindən vətəndaş göndərilib və insan alverinin qurbanı olur. Xarici ölkədə və ya universitetə yaxınlaşdıqda bildirilir ki, sizin burada qəbulunuz yoxdur. Belə hallar təəssüflər olsun ki, var, vətəndaşlar ayıq-sayıq olmalıdırlar. Daha çox bu istiqamətdə uzun illər fəaliyyətdə olan müəyyən şirkətlərə müraciət etsinlər. Mütəxəssis rəyi almaq da olar".
Aytəkin TOFİQQIZI
Bizi Telegram-da izləyin...
