Bu il blok imtahanları asan olacaq? - Ekspert AÇIQLADI
"Buraxılış imtahanlarının çox çətin olmaması gələcəkdə blok imtahanlarının da çox çətin olmayacağından xəbər verir. Blok imtahanı aşağı-yuxarı eyni səviyyədə olacaq".
Bu fikirləri Redaktor.az-a təhsil eksperti Ramin Nurəliyev bu il blok imtahanlarının asan və ya çətin olacağı mövzusunu şərh edərkən bildirdi.
"Çox cüzi asan olacağını ehtimal edirəm. Ən pis ehtimalla keçənilki səviyyədə blok imtahanı keçiriləcək. Blok imtahanı keçən ilə nisbətən çətin olmayacaq, çünki plan yerlərinin artırılacağı qeyd olunur. Əgər plan yerləri artırılarsa, plan yerlərinin dolmasına görə sualların çətin salınması abituriyentlərin kütləvi şəkildə müsabiqə şərtlərini ödəməməsi ilə nəticələnə bilər. Bu da plan yerlərinə ciddi təsir göstərər".
Ekspert qeyd etdi ki, plan yerlərinin artması, Dövlət İmtahan Mərkəzinin (DİM) blok imtahanlarını çox da çətinləşdirməyəcəyindən xəbər verir.
"DİM vəziyyəti elə nizamlamalıdır ki, dövlətin verdiyi plan yeri, müsabiqə şərtini keçən abituriyentlərin sayından az olsun. Keçən il 57-58 min plan yeri var idisə, müsabiqə şərtini keçənlər 65 min nəfər idi. 65 min plan yeri varsa, şərtləri keçənlərin sayı 70 mindən yuxarı olmalıdır ki, ciddi formada müsabiqə həyata keçirilə bilsin. Düşünürəm ki, blok imtahanları çətin salınmayacaq", - deyə müsahibimiz bildirdi.
Aytəkin TOFİQQIZI
Bizi Telegram-da izləyin...
