"Tələbələr iş həyatına üçüncü kursdan başlamalıdır" - İlqar Orucov
"Tələbələrin karyeraya başlaması üçün ən ideal vaxt ikinci kursun sonu və ya üçüncü kursun əvvəlidir. Bu dövr tələbənin həm universitet mühitinə tam uyğunlaşdığı, həm də ixtisasın təməl biliklərinə yiyələndiyi mərhələ kimi xüsusi əhəmiyyət daşıyır".
Bu fikirləri Redaktor.az-a açıqlamasında Azərbaycan Gənc Alim, Doktorant və Magistrlər Cəmiyyətinin sədri, təhsil eksperti İlqar Orucov səsləndirdi.
O qeyd etdi ki, birinci kursda tələbələrin əsas hədəfi yeni akademik mühitə alışmaq, dərslərdə yüksək göstəricilər əldə etmək və xarici dil, rəqəmsal savadlılıq kimi fundamental bacarıqları inkişaf etdirmək olmalıdır:
"Bu erkən mərhələdə tam və ya yarımştatlı işləmək təhsil keyfiyyətini aşağı sala bilər, çünki tələbə hələ öz real potensialını və maraq dünyasını tam kəşf etməmiş olur. İkinci kursa qədəm qoyduqda isə artıq peşəkar mühitlə ilk təmasları qurmaq, universitet klublarında aktivlik göstərmək və müvafiq layihələrdə könüllü kimi fəaliyyətə başlamaq lazımdır. Könüllülük tələbəyə komanda işi, stress menecmenti və vaxtın idarə olunması kimi mühüm yumşaq bacarıqları qazandırır və bu dövrün sonuna yaxın artıq LinkedIn profili yaradılaraq şəbəkələşmə addımları atılmalıdır".
Ekspert qeyd etdi ki, üçüncü kurs karyera inkişafının qızıl dövrü hesab olunur, çünki şirkətlər adətən öyrənməyə həvəsli və nəzəri bazası olan bu qrup tələbələrə yay təcrübə proqramlarında və yarımştat işlərdə böyük üstünlük verirlər:
"Dördüncü kursa çatdıqda isə məqsəd sıfırdan iş axtarmaq yox, əvvəlki kursda qazanılan təcrübəni rəsmi tamştatlı iş təklifinə çevirmək və diplom müdafiəsi ilə iş qrafikini balanslaşdırmaq olmalıdır. Erkən karyeraya başlamaq məzun olduqda bir-iki illik real təcrübə ilə əmək bazarına öndə daxil olmaq və maddi müstəqillik qazanmaq kimi böyük üstünlüklər fəth etsə də, akademik geriləmə, vaxtsız tükənmə sindromu və tələbəlik illərinin sosial fəaliyyətlərindən məhrum olma risklərini də daşıyır. Bu səbəbdən düşünürəm ki, ən optimal balans birinci və ikinci kursda tamamilə təhsilə və fərdi inkişafa fokuslanmaq, üçüncü kursdan etibarən isə addım-addım peşəkar iş dünyasına keçid etməkdir".
Xədicə BAXIŞLI
Bizi Telegram-da izləyin...
