Metodistlərin rəyi müəllimlərin sertifikatlaşdırılmasına təsir edə bilər - İlqar Orucovdan TƏKLİF

“Müasir təhsil sistemində metodistlərin fəaliyyəti tədrisin keyfiyyətinin davamlı yüksəldilməsini, kurikulum islahatlarının sinif otaqlarında tətbiqini və müəllimlərin peşəkar inkişafını təmin edən əsas institusional mexanizmlərdən biridir”.

Bunu Redaktor.az-a açıqlamasında fəlsəfə doktoru, Azərbaycan Gənc Alim, Doktorant və Magistrlər Cəmiyyətinin sədri İlqar Orucov məktəblərdə metodistlərin fəaliyyətindən danışarkən bildirdi.

Onun sözlərinə görə, təhsil idarəçiliyi və pedaqoji menecment müstəvisində metodist sadəcə inzibati nəzarətçi deyil, həm də müəllim üçün peşəkar mentor və təhsil proqramları ilə praktiki tədris mühiti arasında əlaqələndirici rolunu yerinə yetirən mütəxəssisdir.

“Beynəlxalq pedaqoji araşdırmalar göstərir ki, düzgün qurulmuş metodik dəstək və daxili mentorluq sistemləri ümumi təhsil müəssisələrində təlim göstəricilərinin yüksəlməsinə birbaşa töhfə verir.

Metodistlərin fəaliyyətinin effektivliyi müəllimlərə göstərdikləri metodik dəstəyin üsullarından və müasir təlim texnologiyalarının tətbiqinə kömək etmək bacarıqlarından asılıdır. Effektiv fəaliyyət göstərən metodist müəllimin fəaliyyətindəki çatışmazlıqlara görə sadəcə qeydlər aparan deyil, ona diferensiallaşdırılmış dərs planlarının hazırlanması, interaktiv metodların seçilməsi və şagirdyönümlü təlim mühitinin formalaşdırılması üçün real həllər təklif edən mütəxəssisdir.

Xüsusilə gənc və təcrübəsiz müəllimlərin məktəb mühitinə uyğunlaşması, dərs zamanı vaxtın düzgün bölüşdürülməsi və sinfin idarə olunması məsələlərində metodistin peşəkar dəstəyi mühüm əhəmiyyət daşıyır. Bu yanaşma müəllimlərin rəqəmsal kompetensiyalarının və innovativ pedaqoji metodların dərs prosesinə inteqrasiyasına xidmət edir”.

Ekspert vurğuladı ki, mövcud təhsil idarəçiliyi praktikasında metodistlərin dərslərin keyfiyyətini qiymətləndirməsi və fəaliyyətlərinin effektivliyi baxımından müəyyən institusional boşluqlar və struktur problemlər mövcuddur.

“Bir çox hallarda metodistlərin fəaliyyəti formal hesabatlılıq, sənədləşmə işlərinin çoxluğu və pərakəndə monitorinqlər səbəbindən əsl mahiyyətindən, yəni canlı pedaqoji mentorluq missiyasından uzaqlaşır. Eyni zamanda, metodistlərin hüquqi səlahiyyətlərinin çərçivəsi, onların müəllimlərin fəaliyyətinə təsir imkanları və qiymətləndirmə meyarları bəzən ümumi idarəetmə sistemində tam və aydın şəkildə fərqləndirilmir. Səthi və yalnız bürokratik göstəricilərə əsaslanan daxili qiymətləndirmələr müəllimlərdə metodik xidmətə qarşı inamsızlıq yaradır və onların peşəkar inkişaf motivasiyasını zəiflədir”.

İlqar Orucov hesab edir ki, təhsilin keyfiyyət standartlarının yüksəldilməsi üçün məktəblərdə metodik xidmətin statusu, fəaliyyət profili və səlahiyyətləri müasir çağırışlara uyğun olaraq yenidən qurulmalıdır.

“İlk növbədə, metodistlərin fəaliyyəti kağız üzərində qurulan formal yoxlamalardan tamamilə uzaqlaşmalı, beynəlxalq təcrübədə uğur qazanmış müəllimlərin peşəkar inkişaf icmaları modelinə uyğunlaşdırılmalıdır. İkincisi, metodistlərin özlərinin də mütəmadi olaraq innovativ texnologiyalar, təlim analitikası və müasir ölçmə-qiymətləndirmə meyarları üzrə ixtisasartırma proqramlarına cəlb olunması zəruridir.

Nəhayət, ailə, məktəb və pedaqoji heyət arasında qarşılıqlı etimad mühitinin formalaşması üçün metodistlərin verdiyi rəylər müəllimlərin sertifikatlaşdırılması və fərdi stimullaşdırılması sistemində obyektiv meyar kimi nəzərə alınmalıdır. Yalnız elmi əsaslara söykənən, çevik və praktiki dəstək funksiyasını yerinə yetirən metodik infrastruktur dövlətin müəyyən etdiyi dünyəvi təhsil standartlarının hər bir sinif otağında uğurla reallaşmasını təmin edə bilər”.

Aytəkin TOFİQQIZI