Goranboyda şəhid atası həbs olundu

 09:33 23.09.2021     1009

Goranboy rayonunda baş verən qətl hadisəsi ilə bağlı cinayət işi açılıb.

Bu barədə Redaktor.az-a rayon prokurorluğundan məlumat verilib.

Bildirilib ki, sentyabrın 22-i saat 14 radələrində 1966-cı il təvəllüdlü Fərrux Qasımovun xəsarət alması nəticəsində ölməsi barədə Goranboy Rayon Prokurorluğuna məlumat daxil olub.

Aparılan araşdırmalarla zərərçəkmişin qohumu, 1956-cı il təvəllüdlü Əmiraslan Nağıyevin şəxsi münasibətlər zəminində aralarında yaranmış münaqişə zamanı idarə etdiyi “Niva” markalı avtomobillə Fərrux Qasımovun üzərinə sürməklə xəsarətlər yetirərək qəsdən öldürməsinə əsaslı şübhələr müəyyən edilib.

Faktla bağlı rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.

Əmiraslan Nağıyev şübhəli şəxs qismində tutularaq istintaqa cəlb edilib.

Hazırda cinayət işi üzrə zəruri istintaq tədbirləri davam etdirilir.

Qeyd edək ki, yerli sakinlərdən aldığımız məlumata görə, Fərrux Qasımovla Əmiraslan Nağıyev qudadırlar. Hadisəni törətməkdə şübhəli bilinən Əmiraslan Nağıyev İkinci Qarabağ müharibəsi şəhidi gizir Vüsal Nağıyevin atasıdır. Qudalar arasında öncədən ailə münaqişəsi olduğu bildirilir.