Baş Prokurorluqdan Bakıdakı qətllə bağlı MƏLUMAT - YENİLƏNİB
Baş Prokurorluq Bakının Xətai rayonunda törədilən qətllə bağlı məlumat yayıb.
Baş Prokurorluğun Mətbuat xidmətindən Redaktor.az-a bildirilib ki, paytaxtın Xətai rayonunu ərazisində 1983-cü il təvəllüdlü Raminə Qəribovanın öldürülməsi barədə rayon prokurorluğuna ilkin məlumat daxil olmuşdur.
Aparılmış araşdırmalarla zərərçəkmişin keçmiş əri 1976-cı il təvəllüdlü İlqar Qəribovun şəxsi münasibətlər zəminində aralarında yaranmış münaqişə zamanı bıçaqla çoxsaylı xəsarətlər yetirərək Raminə Qəribovanı qəsdən öldürməsinə əsaslı şübhələr müəyyən edilib.
Faktla bağlı Xətai rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.
İlqar Qəribov şübhəli şəxs qismində tutularaq istintaqa təhvil verilib.
Hazırda iş üzrə istintaq davam edir.
***
Bakıda kişi keçmiş arvadını qətlə yetirib.
Bu barədə Redaktor.az-a Daxili İşlər Nazirliyinin (DİN) mətbuat xidmətindən məlumat verilib.
O bildirib ki, hadisə Xətai rayonunda, Həzi Aslanov metro stansiyasının yaxınlığında qeydə alınıb.
Belə ki, 1983-cü il təvəllüdlü Raminə Qəribova keçmiş əri, 1976-cı il təvəllüdlü İlqar Qəribov tərəfindən qətlə yetirilib.
İlqar Qəribov polis əməkdaşları tərəfindən "isti izlərlə" saxlanılıb.
Qeyd edək ki, cütlük ötən ilin avqust ayında boşanıb. Hadisənin qısqanclıq zəminində törədildiyi bildirilir.
Bizi Telegram-da izləyin...
