Səfirliyimizn əməkdaşları məruz qaldıqları terror barədə danışdılar - VİDEO
Azərbaycanın Tehrandakı səfirliyinin əməkdaşları diplomatik nümayəndəliyə edilən terror hücumu barədə danışıblar.
Redaktor.az xəbər verir ki, səfirlik əməkdaşlarının ilkin ifadələrini hadisə yerində Tehran polisinin rəisi Hüseyn Rəhimi dinləyib.
Cinayətkarı zərərsizləşdirən səfirlik əməkdaşı bildirib ki, terrorçu hadisə yerinə avtomobillə gəlib:
“O, öz maşını ilə səfirliyin avtomobilini vurub. Yanında xanım vardı. Əlində avtomat tutmuşdu. Orxan içəri girdikdən sonra silahlı şəxs də arxasınca gəldi və atəş açmağa başladı”.
Səfirliyin nümayəndəsi deyib ki, cinayətkarı zərərsizləşdirmək üçün arxadan ona yaxınlaşıb:
“Onu tutdum və avtomatdan açılan atəşin mənə dəyməməsinə çalışdım. Dayanmadan avtomatdan atəş açırdı. Məni vurmaq istəyirdi”.
Səfirliyin digər əməkdaşı qeyd edib ki, diplomatik nümayəndəliyin qarşısındakı avtomobillərinin vurulduğunu eşitdikdən sonra Orxan Əsgərov geri qayıdıb və bu zaman cinayətkar onu avtomatla vurub:
“Sonra mən yaralanan Orxanın ürəyini masaj etməyə başladım”.
Xatırladaq ki, bu gün səhər saatlarında Azərbaycanın Tehrandakı səfirliyinə silahlı hücum edilib. Hücum dəf edilərkən diplomatik missiyanın mühafizəsinə cavabdeh olan Azərbaycan təhlükəsizlik qüvvələrinin əməkdaşı Orxan Əsgərov qəhrəmancasına həlak olub, daha iki nəfər yaralanıb. Hücum edən şəxs saxlanılıb (oxu.az).
Bizi Telegram-da izləyin...
