Psixiatriya Xəstəxanasındakı yeniyetməni nəzarətçi öldürüb? - AÇIQLAMA

 11:53 21.02.2024     402

Sosial şəbəkələrdə Respublika Psixiatriya Xəstəxanasında yeniyetmənin həkim zorakılığı nəticəsində öldüyü ilə bağlı məlumatlar yayılıb. İddiaya əsasən, ölüm həkimin ona yemək yeyərkən arxadan yumruq vurması nəticəsində baş verib. 

Baş Prokurorluq iddialarla bağlı açıqlama yayıb. Qurumdan Redaktor.az-a verilən məlumata görə, ötən il dekabrın 27-də Respublika Psixiatriya Xəstəxanası Publik Hüquqi Şəxsində müalicə alan B.V-nin (şərti) yemək yeyərkən başının arxa hissəsindən sillə vurulması nəticəsində boğularaq ölməsi barədə Baş Prokurorluğun Mətbuat xidmətinə media nümayəndələri tərəfindən çoxsaylı sorğular daxil olub. 

Verilmiş sorğulara cavab olaraq bildirilib ki, həmin faktla bağlı hazırda Sabunçu Rayon Prokurorluğunda araşdırma aparılır. 

Araşdırma zamanı məhkəmə tibbi-ekspertizası və digər laborator müayinələr keçirilib, eləcə də, zəruri prosessual hərəkətlər icra edilib.

Məhkəmə-tibbi ekspertizanın rəyinə əsasən, şəxsin ölümünə səbəb tənəffüs yolları, udlaq və qırtlağın yad cisimlə tutulması nəticəsində baş vermiş mexaniki asfiksiya (boğulma) olub. 

Həmçinin, ekspertizanın rəyi ilə müəyyən olunub ki, şəxsə sillə ilə vurulması nəticəsində yad cismin tənəffüs yoluna düşməsi inkar olunur.

Qeyd edək ki, sosial şəbəkələrdə yayılan məlumata görə, Maştağada yerləşən Respublika Psixiatriya Xəstəxanasında nəzarətçi qadın 17 yaşlı yeniyetməni yemək yeyərkən arxadan başına yumruq vurmaqla öldürüb. "Kamera görüntüləri göstərir ki, yeniyetmə heç bir pis hərəkət etmir, sakit oturub yemək yeyir. Bu zaman nəzarətçi uşagı vurur və bir tikə ət parçası uşagın nəfəs yoluna düşür və uşaq iki dəqiqənin qurbanı olur. Bütün bu olanlar kamerada aydın şəkildə görsənir", - deyə sosial şəbəkədə yazılıb.

2