"Bravo"da silahlı hücumla bağlı məhkəmə: "Hansısa yeri partladıb, pul qazanacaqlarını dedi"

 11:43 04.04.2024     197

Bakıda "Bravo" hipermarketində baş vermiş silahlı insidentlə bağlı cinayət işi üzrə növbəti məhkəmə prosesi keçirilib.

Redaktor.az xəbər verir ki, Bakı Ağır Cinayətlər Məhkəməsində hakim Azad Məcidovun sədrliyi ilə keçirilən prosesdə şahidlər ifadə verib. Şahid Əhməd Məmmədov hadisədə istifadə edilən "Opel" markalı maşının sahibi olduğunu deyib: "Təqsirləndirilən şəxslərdən heç birini tanımıram. Opel maşınının sahibi olmuşam. Onu da satmaq üçün bazara çıxardım. Ruhlan adlı biri maşını aldı. Nə üçün aldığını bilmirdim. Maşını satandan 8-9 ay sonra bu hadisə olub. Hadisədən xəbərim olmayıb".

Daha sonra iş üzrə şahid Xandadaş Cəfərovifadə verib. O, təqsirləndirilən Dəyanət Qüdrətovun əsgər yoldaşı olduğunu deyib: "Təqsirləndirilən şəxslərdən sadəcə, Dəyanəti tanıyıram. Əsgərlikdə bir yerdə xidmət etmişik. Yanvar ayında ikimiz də tərxis olunduq. Tərxis olunandan sonra 2 dəfə görüşmüşük. Bir dəfə də mənə yazdı ki, görüşək. Mən restoranda ofisiant işləyirəm. Yazdım ki, vaxtım yoxdu. Bir dəfə də yazdı ki, rayona gedəcəm sonra görüşə bilməyəcəyik. Hadisəni törədəcəyindən xəbərim olmayıb. Hadisədən sosial şəbəkələrdən xəbət tutmuşam".

Daha sonra hakim Azad Məcidov şahidin istintaqa verdiyi ifadə ilə məhkəmədə verdiyi ifadə arasında ziddiyyət olduğunu deyib. Buna görə onun istintaqa verdiyi ifadə elan edilib: "Fevral ayında Dəyanətlə whatsappda danışırdım. Mənə hansısa yeri partladıb pul tutacaqlarını dedi. Onunla danışanda ona qorxaq dedim. Mənə dedi ki, bilirsən nə işlə məşğulam? Hələ əsgərlikdə olanda deyirdi ki, silahlı şou olacaq. Onda bildim ki, harasa silahlı basqın edəcək. Ad günü olduğu üçün Salyana getmişdim. Onunla yenə mesajlaşırdıq. Mənə AKS markalı silahın şəklini atdı, qundağı açıq idi. Dedi ki, tutulmasam, sənə qəşəng ad günü keçirəcəm. Tutulsam, da yanıma siqaret gətirərsən. Sonra yazdı ki, bu boyda Azərbaycanda kimdi e məni tapan. Sonra məni İsmayıllıya qonaq dəvət etdi. Hadisə günü mənə mesaj yazmışdı. Yazmışdı məni televizorda göstərsələr, xəbər elə. Bir az keçmişdi yazdı ki, məni axtarırlar sənə nə yazmışam hamısını sil. Dedi nömrəmi və telefonumu qıracam. Yazdı ki, gəl Koroğlu metrosuna tərəf görüşək, sonra görüşə bilməyəcəyik. Mən işdə olduğuma görə getmədim".

Hakim verdiyi ifadələrin arasında nəyə görə ziddiyyət olduğunu X. Cəfərovdan soruşub. Şahid isə hadisən uzun zaman keçdiyini, unutduğunu deyib, istintaqa verdiyi ifadəni isə təsdiqlədiyini bildirib.

Növbəti məhkəmə prosesi şahidlərin ifadələri ilə davam edəcək.

Məhkəmə prosesi aprelin 17-də davam etdiriləcək.

Xatırladaq ki, hadisə ötən il martın 4-də qabaqcadan əlbir olan bir qrup şəxs tərəfindən paytaxtın Xətai rayonu ərazisində yerləşən “Bravo” hipermarketində qeydə alınıb. Edilən silahlı basqın nəticəsində xidməti vəzifəsini yerinə yetirərək orada quraşdırılmış “Unibank Kommersiya Bankı” ASC-yə məxsus bankomata pul vəsaitlərini yerləşdirən Samir Şaydayevə ağır xəsarət yetirilib. Onun mühafizəsini təşkil edən Rüfət Həşimovun isə öldürülərək, külli miqdarda pul vəsaiti ələ keçirilib.

Cinayət işi üzrə toplanmış mötəbər sübutlar əsasında 6 nəfər - 1 şəxs qabaqcadan əlbir olan bir qrup şəxs halında və quldurluqla əlaqədar xidməti vəzifəsini yerinə yetirən şəxsi qəsdən öldürmə, eləcə də öldürməyə cəhd etməyə görə, 3 şəxs eyni əməllərinin törədilməsinə köməkliyə görə, 1 şəxs qabaqcadan əlbir olan bir qrup şəxs halında odlu silah hazırlamağa köməkliyə görə, 1 şəxs isə bu cinayət əməlini törətməyə təhrik etməyə görə cinayət məsuiyyətinə cəlb edilib.

Belə ki, cinayəti icra etmiş Dəyanət Qudrətova Cinayət Məcəlləsinin 120.2.1, 120.2.3, 120.2.11 (qabaqcadan əlbir olan bir qrup şəxs halında və quldurluqla əlaqədar xidməti vəzifəsini yerinə yetirən şəxsi qəsdən öldürmə), 29, 120.2.1, 29, 120.2.3, 29, 120.2.7, 29, 120.2.11 (qabaqcadan əlbir olan bir qrup şəxs halında, ümumi təhlükəli üsulla və quldurluqla əlaqədar xidməti vəzifəsini yerinə yetirən iki şəxsi qəsdən öldürməyə cəhd), 181.3.2 (sağlamlığa ağır zərər vurmaqla quldurluq), 228.2.1, (qanunsuz olaraq odlu silah, onun komplekt hissələri və döyüş sursatını əldə etmə, daşıma və gəzdirmə), 229.2.1 (qabaqcadan əlbir olan bir qrup şəxs tərəfindən odlu silah hazırlama) və digər maddələri ilə cinayət işi açılıb. Cinayətin törədilməsində köməkçilər - Azər Məmmədov, İbrahim İbrahimov və Səbuhi Qurbanova həmin Məcəllənin 32.5, 120.2.1, 32.5, 120.2.3, 32.5, 120.2.11, 32.5, 29, 120.2.1, 32.5, 29, 120.2.3, 32.5, 29, 120.2.11, 32.5, 29, 120.2.7, 32.5, 181.3.2, 228.2.1, 229.2.1 və digər maddələri, cinayətin törədilməsində köməkçi - Rövşən İsmayılova həmin Məcəllənin 228.2.1 və 32.5, 229.2.1-ci, cinayətin törədilməsində təhrikçi Babək İsgəndərova isə qeyd olunan Məcəllənin 228.2.1 və 32.3, 229.2.1-ci maddələri ilə ittiham elan edilib.

Həyata keçirilən təxirəsalınmaz istintaq-əməliyyat tədbirləri nəticəsində cinayətin törədilməsində iştirak edən Ruhlan İsmayılov tutularkən polis əməkdaşlarına qarşı silahlı müqavimət göstərdiyi üçün zərərsizləşdirilib.

Ruhlan İsmayılovun qeyd edilən cinayətdə təqsiri istintaq zamanı tam sübuta yetirilsə də onun barəsində yeni xarakterli xüsusatlar aşkar edildiyinə görə, barəsində cinayət işi ayrılaraq istintaqı davam etdirilir.

Cinayətin törədilməsində istifadə edilən AKS Lancaster-03” markalı yivsiz ov tüfəngi, “Makarov” tipli tapança, həmçinin təqsirləndirilən şəxslərin yaşadığı ünvandan “Minta37” markalı tapança, çoxsaylı döyüş sursatları, “Unibank Kommersiya Bankı” ASC-yə məxsus 16 min 835 manat və 20 min 100 ABŞ dolları məbləğində pul vəsaitləri aşkar edilərək götürülüb (apa).