Xuliqanlıqda ittiham olunan idmançılara prokuror cəza istəyəcək

 21:23 28.06.2024     245

Xuliqanlıqda ittiham olunan MMA və Qrapplinq Federasiyasının qarışıq döyüş növləri üzrə baş məşqçisi Ruslan Əfəndiyev və tələbələri – Xəzər Rüstəmov, Vüqar Kərəmov və Rüfət Əsədov, Tofiq Musayevin cinayət işi üzrə məhkəmə prosesi davam edib.

Redaktor.az APA-ya istinadən xəbər verir ki, Səbail rayon Məhkəməsində hakim Azər Tağıyevin sədrliyi keçirilən prosesdə şahid qismində Bakı şəhər Halqasının əməkdaşları Elgün Tağızadə, Səbri Gülmalıyev, hadisə vaxtı “Dəniz Mall”ın mühafizə xidmətinin rəisi Taleh Hüseynov və idmançı-məşqçi Şəhriyar Abbasov ifadə verib.

Onlar hadisəni görmədikləri bildiriblər.

Prosesdə məhkəmə istintaqı başa çatıb. Söz prokurora verilsə də, dövlət ittihamçısı çıxış üçün məhkəmədən vaxt istəyib.

Proses iyulun 1-də davam etdiriləcək.

Qeyd edək ki, hadisə Səbail rayonu ərazisində baş verib.

İttihama görə, təqsirləndirilən idmançılar “Rizin” Döyüş Federasiyasının paytaxtda təşkil etdiyi turnirlə bağlı toplaşarkən mübahisə yaranıb. Mübahisə zamanı idmançı Həsən Əzizov döyülüb.

Cinayət işinin istintaqı Bakı Şəhər Baş Polis İdarəsi tərəfindən aparılıb.

Ruslan Əfəndiyev və onun tələbələri – Xəzər Rüstəmov, Vüqar Kərəmov və Rüfət Əsədov barəsində həbsdədir. T.Musayev və Mehman Məmmədov istintaq dövrü müddəti üçün həbslə bağlı olmayan qətimkan tədbiri seçilib. Bir neçə gün əvvəl təqsirləndirilən şəxslərə Cinayət Məcəlləsinin 221.2.1-ci (bir qrup şəxs tərəfindən və ya təkrarən xuliqanlıq törədildikdə) maddəsi ilə yekun ittiham irəli sürülüb.

İstintaqın sonunda iş üzrə təqsirləndirilən Mehman Məmmədovun barəsindəki cinayət işinə bəraət verici əsaslarla xitam verilib.