Bakıda tanışının üzünə "kislota" tökən qadına hökm OXUNDU
Bakıda tanışının üzünə "kislota" tökərək xəsarət yetirməkdə təqsirləndirilən Həcər Hüseynovanın cinayət işi üzrə məhkəmənin yekun iclası keçirilib.
Redaktor.az xəbər verir ki, bu gün Bakı Ağır Cinayətlər Məhkəməsində hakim Telman Hüseynovun sədrliyi ilə keçirilən prosesdə hökm oxunub.
Hökmə əsasən, Həcər Hüseynovan 6 il müddətinə azadlıqdan məhrum edilib. Onun barəsində seçilmiş ev dustaqlığı qətimkan tədbiri dəyişdirilib və o, məhkəmə zalında həbs olunub.
Həmçinin zərərçəkmişin mülki iddiası qismən tətbiq edilib, təqsirləndirilən şəxsin 3200 manat ziyan ödəməsi barədə qərar qəbul edilib.
Dövlət ittihamçısı Həcər Hüseynovanın 6 il 6 ay müddətinə azadlıqdan məhrum edilməsini istəmişdi.
Qeyd edək ki, hadisə ötən ilin avqust ayında qeydə alınıb. İttihama görə, Həcər Hüseynova şəxsi münasibətlər zəminində mübahisə etdiyi Azər Ağayevin üzünə "kislota" tökərək onun bədəninin 30-35 faizinin yanmasına səbəb olub.
Ona Cinayət Məcəlləsinin 126.2.3-cü (xüsusi amansızlıqla, o cümlədən zərərçəkmiş şəxsə ağır iztirablar verməklə və ya sifarişlə, habelə təqsirkar üçün aşkar surətdə köməksiz vəziyyətdə olan şəxsə qarşı törədildikdə) maddəsi ilə ittiham irəli sürülüb (APA).
Bizi Telegram-da izləyin...
