Tovuzda itkin düşən azyaşlı tapıldı - YENİLƏNİB
Tovuzda itkin düşən məktəbli qız tapılıb.
Redaktor.az xəbər verir ki, bu barə APA-ya Daxili İşlər Nazirliyinin (DİN) mətbuat xidmətinin Gəncə regional qrupunun baş inspektoru Eşqin Qasımov bildirib.
Onun sözlərinə görə Tovuz Rayon Polis Şöbəsinin əməkdaşlarının keçirdikləri müvafiq tədbirlər nəticəsində A. Süleymanovanın yeri Gəncə şəhərində müəyyən edilib və o Tovuz Rayonuna gətirilib.
Hazırda ailəsinə təhvil verilməsi gözlənilir.
***
15:30
***
Xəbər verildiyi kimi, Tovuzda orta məktəb şagirdi, 13 yaşlı A.Süleymanova ötən gün axşam saat 18:00 radələrində oxuduğu Bozalqanlı kənd tam orta məktəbindən çıxıb və evə qayıtmayıb.
Redaktor.az bizim.media-ya istinadən xəbər verir ki, Tovuz rayonu Yusif Sadıqov adına Bozalqanlı kənd tam orta ümumtəhsil məktəbindən bildirilib ki, dəfələrlə məktəb psixoloqu şagirdlə iş aparıb:
“İtkin düşən qız 7 A sinfinin şagirdidir. Dünən sonuncu dərsdən sonra gedib. Davamiyyəti hər zaman yaxşı olub, amma oxumağı zəif idi. Bir qədər sözə qulaq asan deyil. Məktəb psixoloqu məşğul olurdu onunla. Yeniyetmənin valideynləri boşanandan sonra davranışlarında problem hiss olunurdu. Məktəbli ata babası, nənəsi və əmisi ilə qalırdı. İnşallah sağ-salamat tapılar”.
Azyaşlının atası Elçin Süleymanov isə bildirib ki, uşağın hara getməsi ilə bağlı heç bir ehtimalı yoxdur:
“Hara gedə bilər, heç bilmirəm. Heç bir məlumatımız, ehtimalımız yoxdur. Bir az əsəbi uşaqdır. Hətta onu psixoloq yanına da qoymuşduq. Qızım nənəsi-babası ilə yaşayır. Axırıncı dəfə Qəbələyə ekskursiyaya getmək üçün icazə istədi. Bundan əvvəl iki dəfə gəzintiyə getməsinə icazə vermişdik. Bu dəfə icazə vermədik. Dedik, qız uşağıdır, yol da uzaqdır. Yeganə ehtimal edirik ki, icazə vermədiyimiz üçün əsəbləşib çıxıb gedib.
Dərsdən çıxanda anamla atam məktəbin qabağında olub. Amma maşına minməyib, deyib özüm yavaş-yavaş gəlirəm. Elə ordan da çıxıb gedib. Nə rəfiqələri, nə yoldaşları hara getdiyini bilir. Bütün qohum-əqraba, tanışlar, polis axtarır. Hazırda kameradan hara getdiyinə baxırıq. Kamera göstərir ki, axşam saat 9-da Əlimərdanlı yolunda görünüb. Ümid edirəm izinə düşüb tapa bilərik”.
Qeyd edək ki, DİN Gəncə regional qrupunun baş inspektoru Eşqin Qasımov bildirib ki, hazırda şəxsin yerinin müəyyən edilməsi istiqamətində Tovuz RPŞ-nin əməkdaşları tərəfindən axtarışlar davam etdirilir.
Bizi Telegram-da izləyin...
