Kariyesə qarşı peyvənd yaradılacaq?
Kariyesə qarşı peyvənd yaratmaq mümkün deyil, çünki karies infeksion proses deyil, disbakteriozdur.
Redaktor.az xəbər verir ki, bu fikri fevralın 9-da “İzvestiya”ya müsahibəsində stomatoloq-terapevt Valentina Xarlanova deyib.
Bir gün əvvəl Belarus Dövlət Tibb Universitetinin rektoru, Səhiyyə Nazirliyinin baş ştatdankənar stomatoloqu Sergey Rubnikoviç Belarusda alim və həkimlərin kariyesə qarşı yerli vaksinin yaradılması üzərində işlədiyini bildirib. Bu barədə məlumat idarənin mətbuat xidmətinin Telegram kanalında paylaşılıb.
“Peyvənd işləməyəcək, çünki ağız boşluğunda çoxlu bakteriya yaşayır: streptokoklar, stafilokoklar, laktobakteriyalar və hətta bəlkə də hələ kəşf edilməmiş bakteriyalar. Bu bakteriyalar bütün bədəndə yaşayır və kariyesdən qorunmaq üçün onları yalnız ağız boşluğunda öldürməyə çalışmaq səhvdir”, - Xarlanova deyir.
O qeyd edib ki, kariyesin yaranmasında əsas amil sürətli karbohidratların, yəni şəkərlərin olmasıdır.
“Ona görə də kariyes peyvəndi yaxşı gigiyenadır. Bu o deməkdir ki, dişlərinizi düzgün fırçalamalısınız. Həkimin vəziyyəti izləyə bilməsi üçün altı ayda bir dəfə müayinəyə gəlmək vacibdir. Həmçinin altı ayda bir dəfə diş həkimi kreslosunda ağız boşluğunun peşəkar gigiyenası ilə məşğul olmaq lazımdır”, - deyə mütəxəssis vurğulayıb.
Həmçinin, onun sözlərinə görə, yuxu cədvəlinə, pəhrizə və idmana riayət etməlisiniz, çünki ümumi vəziyyət ağız boşluğunun vəziyyətinə də təsir göstərir. Bundan əlavə, xroniki xəstəliklərə nəzarət etmək lazımdır.
Qeyd edək ki, bundan öncə stomatoloq İrina Seregina ağız boşluğunun gigiyenasının düzgün aparılmamasının fəsadlarından danışıb. Onun sözlərinə görə, düzgün olmayan ağız baxımı diş daşı və müxtəlif diş əti xəstəlikləri kimi ağır nəticələrə gətirib çıxara bilər. Həmçinin, stomatoloq qeyd edib ki, gigiyena qaydalarına riayət edilməməsi səbəbindən ağızda əmələ gələn patogen mikroflora təkcə ağız boşluğuna təsir etmir, həm də mədə-bağırsaq traktının, ürək-damar sisteminin və LOR orqanlarının, eləcə də digər daxili orqanların xəstəliklərinə səbəb ola bilər.
Turan İSMAYIL
Bizi Telegram-da izləyin...
