Sağlam yuxu üçün hansı çatışmazlıqlar aradan qaldırılmalıdır?
Sağlam yuxu üçün bəzi vitamin və hormonların çatışmazlığını aradan qaldırmaq vacibdir.
Redaktor.az xəbər verir ki, bu barədə “Somnoloqlar Assosiasiyası” regionlararası ictimai təşkilatın üzvü, yuxu dərmanı şöbəsinin həkimi Alena Qavrilova “Moskva 24” telekanalına bildirib.
Mütəxəssisin sözlərinə görə, beyində dopamin çatışmazlığı ayaqlarda qeyri-iradi hərəkətlər şəklində özünü göstərə bilər. Bu cür hərəkətlər beynin dərin yuxu fazasına keçməsinə mane olur və onu daimi olaraq yuxuya getmənin ilkin mərhələsinə qaytarır. Gecə oyanmaları isə adətən stress səbəbindən, beyin qabığının hiperaktivləşməsi ilə müşayiət olunur. Bu, insanın mürəkkəb məsələ ilə bağlı narahatlıq keçirdiyi hallarda baş verir və nəticədə beyin yuxu zamanı belə yüksək oyanıqlıq vəziyyətində olur.
Yuxunun keyfiyyətinə D, B1, B6, B9 vitaminləri, həmçinin maqnezium, dəmir, yod, sink və selenium kimi mikroelementlərin çatışmazlığı da təsir göstərir. Bu maddələr sinir sisteminin normal fəaliyyəti üçün zəruridir. Xüsusilə, maqnezium təbii rahatlaşdırıcı rolunu oynayır və onun çatışmazlığı həddindən artıq həyəcan və tez-tez gecə oyanmalarına səbəb olur.
Alena Qavrilova yuxunun keyfiyyətini normallaşdırmaq üçün düzgün gündəlik rejimə riayət etməyi, idmanla məşğul olmağı, həmçinin qəhvə, çay və kakaonun qəbulunu azaltmağı tövsiyə edib. Onun sözlərinə görə, qalın pərdələr və təmiz hava ilə təmin olunmuş otaq da bərpaedici yuxuya kömək edə bilər.
Aytəkin TOFİQQIZI
Bizi Telegram-da izləyin...
