Avropada ultra-emal olunmuş qidaların artışı sağlamlıq üçün ciddi siqnaldır - ARAŞDIRMA
Avropada gündəlik qidalanmada ultra-emal olunmuş məhsulların (UEQ) payı sürətlə artır və bu tendensiya ictimai sağlamlıq sahəsində narahatlığa səbəb olur.
Redaktor.az xəbər verir ki, Londonda yerləşən "Imperial College" universitetinin yeni araşdırması göstərib ki, bəzi Avropa ölkələrində insanların gündəlik kalori qəbulunun 50%-dən çoxu bu tip qidalardan ibarətdir.
Ən çox istifadə olunan məhsullar - hazır şorbalar, paketlənmiş sendviçlər, qazlı içkilər, şəkərli dənli səhər yeməkləri, hazır souslar və dondurulmuş pizzalardır. Tədqiqatçılar qeyd edirlər ki, bu məhsullar yüksək miqdarda şəkər, duz, doymuş yağ və qatqı maddələri ehtiva etdiyindən xroniki xəstəliklərin xüsusilə, piylənmə, şəkərli diabet, ürək-damar xəstəlikləri və hətta bəzi xərçəng növlərinin yaranma riskini artırır.
Fransa və İtaliya kimi ölkələrdə hələ də təbii və evdə hazırlanan yeməklərə üstünlük verilsə də, Almaniya, Niderland və Böyük Britaniyada ultra-emal olunmuş məhsulların istehlakı son 10 ildə 25%-dən çox artıb.
Araşdırmanın müəllifi, professor Tim Lang bildirib:
"Bu qidalar asan və ucuz görünə bilər, amma sağlamlıq baxımından uzunmüddətli ciddi nəticələr doğurur. Biz bunun qarşısını almaq üçün məktəblərdə, marketlərdə və ictimai yerlərdə maarifləndirməni artırmalıyıq".
Avropa İttifaqı səviyyəsində isə bəzi ölkələr artıq bu məhsullar üçün xüsusi etiket sistemləri və vergi mexanizmləri üzərində işləyir. İtaliyada isə ultra-emal olunmuş məhsulların məktəb yeməklərindən çıxarılması barədə qərar qəbul edilib.
Ekspertlər tövsiyə edir ki, gündəlik menyuda təzə tərəvəz, meyvə, tam taxıllı məhsullar və evdə hazırlanan yeməklərin miqdarı artırılsın. Bu sadə dəyişikliklər uzunmüddətli sağlamlıq üçün mühüm rol oynayır.
Nuriyyə NATİQQIZI
Bizi Telegram-da izləyin...
