Uzun müddət telefon istifadəsi boyun qısa qalmasına gətirib çıxarır - Terapevtdən XƏBƏRDARLIQ
Son dövrlərdə gənclər arasında boyun qısalması tendensiyası diqqət çəkir.
Boyun qısalması tendensiyası nədən qaynaqlanır? Bunun qarşısını almaq üçün hansı tədbirlər görülməlidir?
Ailə həkimi-terapevt Pənah Pənahov Redaktor.az-a mövzu ilə bağlı danışarkən bildirdi ki, gənclərdə müşahidə olunan boyun qısalması adətən müasir həyat tərzi ilə bağlı vərdişlərdən qaynaqlanır.
"Xüsusilə uzun müddət mobil telefon və kompüterdən istifadə zamanı bədənin önə əyilməsi boyun fəqərələrinə əlavə təzyiq göstərir. Bu vəziyyət həm əzələlərin zəifləməsinə, həm də boynun vizual olaraq daha qısa görünməsinə səbəb ola bilər".
Onun sözlərinə görə, nadir hallarda genetik faktorlar və ya anadangəlmə skelet quruluşu da rol oynaya bilər:
"Lakin praktikada əsas səbəblər az hərəkətli həyat, düzgün olmayan oturuş və əzələ disbalansıdır. Uzunmüddətli dövrdə bu hal diqqətsiz qalarsa, boyun və bel ağrıları, baş ağrısı, fəqərəarası disklərdə dəyişikliklər, duruş pozğunluqları ilə nəticələnə bilər".
Terapevt faydalı tövsiyələri də sadaladı:
"Gün boyu hərəkətdə olmaq və idman etmək lazımdır. Eyniylə boyun və kürək əzələlərini möhkəmləndirən məşqlərə üstünlük vermək önəmlidir. Düzgün oturuş və iş mühitinin ergonomik təşkili, elektron cihazlardan fasilələrlə istifadə də əsas məsələlərdən hesab olunur. Bu qaydalara riayət etməklə həm boyun sağlamlığını qorumaq, həm də gələcəkdə ciddi fəsadların qarşısını almaq mümkündür", - deyə P.Pənahov fikrini yekunlaşdırdı.
Aytəkin TOFİQQIZI
Bizi Telegram-da izləyin...
