Həkim qəhvə ilə bağlı məşhur mifi təkzib ETDİ
Orta miqdarda qəhvə içməyin orqanizmi susuzlaşdırdığına dair geniş yayılmış fikir həqiqəti əks etdirmir.
Redaktor.az xəbər verir ki, bu barədə Florida Universitetinin Qida Elmləri və İnsan Qidalanması İnstitutunun mütəxəssisi Laura Akosta bildirib.
Onun sözlərinə görə, kofein sidik ifrazını müəyyən qədər artıra bilsə də, qəhvənin tərkibindəki maye bu təsiri əksər hallarda kompensasiya edir. Buna görə də mülayim miqdarda qəhvə qəbul edən sağlam insanlarda susuzlaşma müşahidə olunmur.
Mütəxəssis qeyd edib ki, qəhvənin orqanizmi susuzlaşdırdığı barədə təsəvvür əsasən illər əvvəl aparılmış və məhdud sayda iştirakçını əhatə edən araşdırmalardan qaynaqlanır. Sonrakı tədqiqatlar isə müntəzəm qəhvə istehlak edən insanlarda hidratasiya göstəricilərinin su içənlərlə müqayisədə əhəmiyyətli dərəcədə fərqlənmədiyini göstərib.
Bununla yanaşı, həkim vurğulayıb ki, çox yüksək dozada kofein qəbulu bəzi insanlarda maye itkisini artıra bilər. O, qəhvənin suyun əvəzi olmadığını, lakin gündəlik maye qəbulunun bir hissəsi hesab edilə biləcəyini də əlavə edib.
Xədicə BAXIŞLI
Bizi Telegram-da izləyin...
