Soyuqdəymə dərmanları mədəyə zərər verə bilər - Həkimdən XƏBƏRDARLIQ
Soyuqdəymə zamanı istifadə edilən bəzi dərmanlar mədənin selikli qişasını qıcıqlandıra və hətta onun zədələnməsinə səbəb ola bilər.
Redaktor.az xarici mediaya istinadən xəbər verir ki, bu barədə Moskva Səhiyyə Departamentinin 195 saylı şəhər poliklinikasının terapevti Rüfat Panaxov məlumat verib.
Həkimin sözlərinə görə, bəzi ağrıkəsici və iltihabəleyhinə preparatlar mədənin selikli qişasına mənfi təsir göstərir. Xüsusilə əvvəllər mədə xorası və ya mədə-bağırsaq qanaxması keçirmiş şəxslər, yaşlı insanlar, həmçinin antikoaqulyant və bəzi digər dərmanlar qəbul edənlər daha diqqətli olmalıdır.
Əsas risk qrupuna qeyri-steroid iltihabəleyhinə preparatlar (QSİƏP) daxildir. Bu dərmanlar mədənin selikli qişasını mədə şirəsinin aqressiv təsirindən qoruyan fermentin fəaliyyətini zəiflədir. Nəticədə mədənin turş möhtəviyyatı orqanın divarlarını zədələyə, iltihab, eroziya və hətta xora yarada bilər.
Həkim həmçinin soyuqdəymə əleyhinə kombinə edilmiş preparatların istifadəsinə diqqət çəkib. Belə dərmanların tərkibində parasetamol, xlorfenamin və askorbin turşusu kimi bir neçə aktiv maddə ola bilər. Ayrı-ayrılıqda bu komponentlər qıcıqlandırıcı təsir göstərə, onların birlikdə qəbulu isə mədə-bağırsaq sisteminə düşən ümumi yükü artıra bilər.
Mütəxəssis dərmanların dozasına və qəbul müddətinə əməl etməyin vacibliyini vurğulayıb. Həzm sistemi xəstəlikləri olan şəxslərə isə preparat seçimini həkimlə müzakirə etmək tövsiyə olunur. Təyin edilmiş müalicəni həkimlə məsləhətləşmədən dəyişdirmək məsləhət görülmür.
Həkim sağlam qidalanma üçün kifayət qədər tərəvəz, meyvə, paxlalılar və tam taxıllı məhsullar qəbul etməyi, rafinə edilmiş karbohidratların, şəkərin və qızardılmış qidaların miqdarını azaltmağı tövsiyə edib. Tibbi göstəriş olmadığı halda yağları tamamilə rasiondan çıxarmaq da düzgün deyil. Balıq və zeytun yağı kimi mənbələrdən alınan doymamış yağlar sağlam qidalanmanın normal hissəsi hesab olunur.
NURİYYƏ
Bizi Telegram-da izləyin...
