Turşu qoyarkən bunlara əməl edin - Mütəxəssisdən vacib TÖVSİYƏLƏR
Yay ayları başlayan kimi bir çox evlərdə mətbəxlər yenidən canlanır. Bəziləri üçün bu mövsüm dəniz və istirahətlə bağlansa da, bir çox xanımlarımız üçün yayı əsl "qışa hazırlıq" dövrü adlandırmaq olar. Xiyar, pomidor, kələm kimi tərəvəzlərlə bankalar dolur, şirin mürəbbə və meyvə kompotları hazırlanır. Lakin bəzən min bir zəhmətlə hazırladığımız bu ləzzətlər bir neçə həftə sonra kəskin qoxu, ağ təbəqə və köpüklə bizi məyus edir.
Evdə hazırlanan turşular niyə tez xarab olur?
Mövzu ilə bağlı fikirlərini Redaktor.az-a danışan qida eksperti Asim Vəliyev bildirdi ki, bəzi hallarda turşuların üstündə "ağ təbəqə" dediyimiz kif, köpüklənmə və pis qoxu müşahidə edə bilirik. Onun sözlərinə görə, bu hallar qıcqırma və mikrobioloji xarab olmanın əlamətidir:
"Turşu hazırlığında vacib məqamlardan biri təmizlikdir. İstifadə etdiyimiz bankalar, qablaşdırma alətləri və qapaqlar mütləq isti su ilə yaxşıca yuyulmalı, sonra isə sterilizə edilməlidir. Tərəvəzlər də təmiz yuyulmalı, torpaq və çirkdən tam təmizlənməlidir. Torpaq mənşəli mikroorqanizmlər turşunun qıcqırmasına səbəb ola bilir. Turşuların uzun müddət xarab olmadan saxlanması üçün konservləşdirici təsiri olan maddələr lazımdır. Ənənəvi üsullarla hazırlanan turşularda 5–9%-lik sirkə istifadə olunur. O, pH səviyyəsini aşağı salaraq bakteriyaların çoxalmasının qarşısını alır. Limon duzu və ya limon suyu da turşuluğu artıraraq qida təhlükəsizliyini təmin edə bilir".
Mütəxəssis vurğuladı ki, duz həm ləzzət, həm də konservasiya üçün vacibdir.
"Az duz qoymaq mikroorqanizmlərin çoxalmasına səbəb ola bilər. Vacib şərt istifadə etdiyimiz nisbətlərə diqqət etməkdir. Çox az sirkə və ya duz qoysaq, turşular tez xarab ola bilər. Bütün qidalarda olduğu kimi, burada da turşuların hazırlandıqdan sonra harada və necə saxlanması vacib məsələdir. Əgər qaynadılıb, qapağı möhkəm bağlanıbsa, sərin və quru yerdə saxlamaq yetərlidir. Yox əgər açıq şəkildə və ya çiy üsulla hazırlanıbsa, soyuducu şəraitində saxlanmalıdır. Mütləq şəkildə birbaşa günəş şüası düşən yerlərdən uzaqda saxlanmalıdır. Bankanın içində hava qalarsa və ya qapaq boş bağlanarsa, bu hal da mikroorqanizmlərin çoxalmasına şərait yaradır. Bəziləri turşu hazırlanmasında dad vermək üçün qatqılar, müxtəlif ədviyyatlar və hazır qarışıqlardan istifadə edir. Alınan qarışıqların təmiz və istifadə müddəti keçməmiş məhsullar olmasına diqqət etsək, yaxşı olar. Təbii üsullardan olan sarımsaq, şüyüd və qara istiot daha yaxşı seçimdir", - deyə A.Vəliyev bildirdi.
Nuriyyə NATİQQIZI
Bizi Telegram-da izləyin...
